Pisortat inissiaataanni maanna qimmeqartoqarlunilu qitsuuteqartoqarsinnaanngulerpoq
Pisortat inissiaataanni tunngaviusumik qimmeqarlunilu qitsuuteqartoqarsinnaanissaa, Inatsisartut isumaqatigiittut taperserpaat.
Pisortat inissiaataanni qimmeqarneq aamma qitsuuteqarneq tunngaviusumik akuerisaalissaaq – aamma apereqqaarani.
Randi Vestergaard Evaldsenip (D) siunnersuutigisaa Inatsisartunit isumaqatigiittunit ippassaq ilalerneqarmat tamanna ersarissivoq. Siunnersuutip inaarutaasumik ilusilerneqarnera sanaartornermut ataatsimiititaliamit suliarineqareernermini allanngortinneqarsimavoq.
Siunnersuutip kingunerisaanik Naalakkersuisut aappaagu ukiakkut ataatsimiinnermi, inissianik attartornermut aamma ileqqorissaarnissamut malittarisassanik allanngortitsinissamik siunnersuuteqarnissaannik tamanna kinguneqassaaq, taamaalilluni tunngaviusumik akuersissummik pissarseqqaarnani qimmeqartoqarsinnaanngorlunilu qitsuuteqartoqarsinnaalissalluni, pissutsinik immikkut ittunik pisoqanngippat.
Minnerpaamik ukioq ataaseq qaangiuppat malittarisassat nutaat atuutilersinnaassapput. Kisianni sanaartornermut ataatsimiititaliap siunnersuummini pisortat inissiaataanni maanna qimmeqarsinnaaneq imaluunniit qitsuuteqarsinnaaneq maanna ajornannginneruleriissasoq oqariartuutigaa.
- Namminersorlutik Oqartussat inissiaatileqatigiiffii assingusumik nalunaarfigineqassasut, maannakkuugallartumut periuseqarneq uumasuuteqarnermut akuersaartuusoq, inissiami pineqartumik pissutsit allamik tikkuussinngippata, siunnersuummi akuerineqartumi tamanna allaqqavoq.