Nannup neqaa Kangerlussuarmi sassaalliutigineqassaaq
Illersortariaqarsimaneq pissutigalugu nanoq politiiniit septembarimi aallaaneqarpoq. Maanna Kangerlussuarmi innuttaasut neqituunnissamut aggersarneqarput.
Kalaallit Nunaata Politiivisa sumiiffimmi, ilaatigut Hotel Kangerlussuaq ikiorsiullugu, suleqatigiinnikkut Kangerlussuarmi innuttaasunut nereqatigiinnissamut piareersaapput.
- Tassani nannup neqaa nerisassaassaaq. Neqi tassaavoq nannup septembarip 24-ani illersortariaqarsimaneq pissutigalugu politiiniit aallaaneqartup, neqaa. Nanoq nunaqarfimmut qanillilluinnarmat taamaalillunilu innuttaasunut navianarmat toqunneqarpoq, politiit allapput.
Nannup neqaata annerpaartaa aaqqissuussinermi sassaalliutigineqassaaq, neqillu ilaa sumiiffimmi meeqqerivimmut tunniunneqarnikuuvoq. Aaqqissuussinissamut tunuliaqutaasoq tassaavoq nunaqarfiup nannup neqaanik pinnaqataanissaa.
- Aaqqissuussineq nunaqarfimmi ataatsimoorussamik pisoqarnerani katerisitsinissamut uumasullu kusanartorsuup allatut ajornartumik toquttariaqarsimasatta pissarsiffigeqataanissaanut periarfissatsialaavoq, Kangerlussuarmi politiinit Patrick Abrahamsen tusagassiutinut nalunaarummi allappoq.
Aaqqissuussineq 9. december nalunaaqutaq 13-17 ingerlanneqassaaq Hotel Kangerlussuarmilu pissalluni.