HIV: Tunillatsittut nutaat tallimat - tuniluunnersoq misissuisoqarpoq

Maannamuugallartoq tuniluuttuni inuit tallimat HIV-mik tunillatsissimapput, allallu arlallit tunillanneqarsimasinnaanerannut maanna misissorneqarlutik. Matumani pineqartut tassaapput inuusuttut 20-it 40-illu akornanni ukiullit Sisimiunut attuumassutillit arlallilli sinerissami sumiiffinni allaniittut.

HIV-ip tuniluunneranik annikitsumik nunarput eqqugaaqqippoq.

- Tamanna tuniluuttup siaruaannissaanik annertuumik ernumalersitsivoq. Tunillatsissinnaanermut sillimanissamik atoqateqarnermilu usuup puuanik atuinikkut isumanaatsumik atoqateqarnissamik, peqqinnissamut tunngatilligu oqartussat innuttaasunik tamanik kajumissaaripput, Nunatsinni Nakorsaaneq Henrik L. Hansen tusagassiutinut nalunaarummi allappoq.

HIV

1985 -imiilli nunatsinni HIV-mik nappaatillit 185-it missaanniinnerat paasineqarpoq. Tunillatsittut amerlasuut toqoreerput ilaallu nunatta avataanut aallarsimallutik. Nunatsinni HIV-mik tunillatsissimasut ullumikkut 70-it missaanniittut inuunertik tamaat peqqinnissaqarfimmit nakkutigisaallutillu nakorsagaassapput. HIV-mut nakorsarluakkat allanik tunillaagajuttanngillat. Nakorsartissinnaaneq ukiualuit matuma siornanut sanilliullugu pitsaanerulersimagaluaqisoq anigugassaanngitsumik nappaateqarneq ilungersunartuuvoq. Tamatuma saniatigut suliassaq taanna peqqinnissaqarfimmut unammilligassaavoq annertooq.

HIV-mik atoqatigiinnikkullu tuniluuttartunik nappaatinik allanik tunillatsissinnaaneq kissaataanngitsumillu naartulersinnaaneq pitsaaliniaraanni isumannaatsumik atoqatigiinneq periarfissatuaavoq. Peqqinnartumik isumannaatsumillu atoqatigiinneq siuarsarniarlugu inuiaqatigiit iluanni arlalitsigut annertuumik iliuseqarnissaq suli pisariaqarpoq.

Paasissutissat: Nunatsinni Nakorsaaneq

Inuusuttut
Maannamuugallartoq tuniluuttuni inuit tallimat tunillatsissimapput, allallu arlallit tunillanneqarsimasinnaanerannut maanna misissorneqarlutik.

- Matumani pineqartut tassaapput inuusuttut 20-it 40-illu akornanni ukiullit Sisimiunut attuumassutillit arlallilli sinerissami sumiiffinni allaniittut, nakorsaaneq oqarpoq.

- Tuniluunnermi matumani inuusukaat eqqugaanerat ernumanaataavoq. Nunatsinni HIV-mik tunillatserlaat agguaqatigiissillugit ukiuinut sanilliullugit, inuusunneroqaat. Misilittakkat naapertorlugit taama ukiullit utoqqaanerusunut sanilliullugit arlalinnik atoqateqartarmata, tuniluunnissaa navianaateqarnerusutut naliliivigineqarpoq.

Tunillatsinnissaq suli annertuvoq
Nunatsinni HIV-mik tunillatsissinnaanerup suli annertunera HIV-p tuniluunnerata takutikkaa Henrik L. Hansen oqarpoq.

- Ajornartorsiut annertuumik ukkanneqanngippat siaruaannerusinnaanera ilimanaateqarluinnarpoq. Taamaattoqassappat innuttasunut ataasiakkaanut inuiaqatigiinnullu annertoorujussuarmik kinguneqassaaq, oqarpoq.

- Nunatsinni syfilisip ajornartorsiutaaleraluttuinnarnerata peqatigisaanik nappaat takkuppoq. Nalunaarutigineqartut ilisimaneqareersut aallavigalugit 2018-imi syfilisimik nappaateqartut 100-it sinningaatsiarnissaat ilimanarsinnaavoq. HIV-ip taamatuttaq siaruaassinnaanissaata navianaataa piviusuuvoq, nakorsaaneq oqarpoq.

Powered by Labrador CMS