Napparsimasut oqaaseqartartoqalersinnaanerat Marthap tapersersunngikkaa

Siullermik meeqqat illersuisortaarput, taava inuit innarluutillit illersuisortaarput, Jess Svanellu Siumumeersup piumasaa malissagutsigu, inuit nappaammik eqqorneqarsimasut oqaaseqartartoqalissagaluarput. Isumali taanna Naalakkersuisunit taperserneqanngilaq.

Inuit nappaammik eqqugaasimasut oqaaseqartartoqalernissaat Peqqissutsimut Naalakkersuisup, Martha Abelsenip (S), pissusissamisoorsorinngilaa, Inatsisartuni oqallinnissamut siunnersuummut akissuteqaammi tamanna paasinarsivoq.

Iliuusereriikkat

Martha Abelsenip unnersuussutigaa ajornartorsiummik ”iliuuserineqareersut pitsanngorsarneqarnerisigut aaqqiisoqartariaqarmat” periarfissallu ilaatigut makku taakkartorlugit:

Peqqinnissaqarfimmi atuisuusunik tassalu napparsimasunik innuttaasunillu suleqateqarnikkut, napparsimasumik siunnersortimik atorluaanikkut

ilinniarnermik siuarsaajuarnikkut, taamaaliornikkut peqqissaasunik amigaateqarnerup annikillisinnissaa anguniarlugu

ataavartumik atorfinititsiniartuarneq

peqatigiiffiit attuumassuteqartut ilanngutinnerisigut

Napparsimasunit peqqinnissaqarfimmi sullissinermut naammagisimaarinninnermut nalilersuinertalik misissuineq 2019-mi ingerlanneqassaaq. Misissuinerup inerneri suliniutit pitsaassutsip qaffassarnissaanut anguniakkanut suliniutinut tunngaviliisuussapput.

Naammagittaalliuutit misissorneqassapput

Peqqinnissaqarfimmi napparsimasunut siunnersorti siorna 500-nik saaffigineqarpoq, Nunatsinnilu Nakorsaaneqarfik septembarimi maalaarutinik misissuilluni aallartippoq, taamaaliortoqarporlu peqqinnissaqarfimmi kiffartuussissutit kukkussutaasut aallaavigalugit pitsanngorsarniarlugu, Inatsisartuni oqallisilinnginnermi Martha Abelsen akissuteqaammi allassimavoq.

Powered by Labrador CMS