Naalakkersuisut: Nikassaanerit sakkortuut politiit misissortassavaat

Salluliorluni pasilliuteqarnerit sakkortuppata, soorlu inuit attaveqaqatigiittarfiini, inummullu annertuumik ajoqusiippata, politiinit misissorneqartalissapput. Naalakkersuisut taama isumaqarput, pinerluttulerinermullu inatsisip allanngortinneqarnissaa siunertaralugu danskit naalakkersuisuinut attaveqarnissamut piareersimapput.

Inuit attaveqaqatigiittarfiini inuk sakkortuumik nikassarneqarpat, pineqartoq eqqartuussivimmut suliassanngortitsissaaq eqqartuussivimmullu 500 koruuninik akiliilluni. Nikanarsaanerit politiit misissussallugit ullumikkut suliassarinngilaat.

Aalajangiiffissatut siunnersuut

Demokraatineersoq Steen Lynge aalajangiiffissatut siunnersuummik saqqummiussivoq, tassani suliat taama ittut politiinit misissuiffigineqartalernissaannut, amerlanerussuteqartunik pilersitsiniarsarivoq.

Inuit attaveqaqatigiittarfiisigut nittartakkanilu allatigut eqqunngitsumik pasilliuteqarnissap ajornannginnera pissutigalugu, ajornartorsiut annertusiartupiloortoq, pineqartunullu annertuumik ajoqusiisartoq, taanna isumaqarpoq.

Steen Lyngep aalajangiiffissatut siunnersuutaanut inatsisinut atuutsitsinermut naalakkersuisoq Doris J. Jensen akissuteqaammik tunniusseqqammerpoq, Naalakkersuisullu Steen Lynge isumaqatigigaat paasinarsivoq.

- Qallunaat pillaasarnermut inatsisaanni pitsaassutsip assinganik illersugaanerullu assinganik pinerluttulerinermi inatsimmi peqarnissarput aallaaviatigut kissaatigaarput, soorunami kalaallit nunaanni pissutsit killissarititaasut eqqarsaatigalugit. Taamaammat nikassaataasumik ajuallatsitsinerit immikkut sakkortuut politiinut unnerluutigineqarsinnaanerinut periarfissap eqqunneqarnissaa Naalakkersuisut isumaqatigaat, Doris J. Jensen akissuteqaammini allappoq.

Nikassaataasumik ajuallatsitsinerit pillugit inatsisinik nutarterinermik Folketingimi ukioq manna suliaqartussaasoq, taanna ilisimatitsivoq.

Annertuumik ajoqusiineq

- Nikassaataasumik ajuallatsitsinerit sakkortuut, eqqartuussummik pinerloqqinngikkaanni naammassineqartussaanngitsumik, pisortanit unnerluussutigineqarsinnaanngornissaat, pillaasarnermi inatsit pillugu siunnersuisoqatigiit matumani siunnersuutigaat. Tassani pasilliinerit ilungersunartut salluusullu (mamarliinerit), ilaatigut pasilliinerit qarasaasiakkut inuit naapittarfii aqqutigalugu saqqummiunneqartut siammarterneqartulluunniit, taamatullu narrujuummisinneqartumut annertuumik ajoqusiisinnaasut, matumani pineqarput, Doris J. Jensen ilisimatitsivoq, taassuma danskit naalakkersuisuinut attaveqarnissaq taperserpaa.

Powered by Labrador CMS