Filmi isummanik pingiliutiinnartakkanik ukkatarinnittoq
Danskit filimiliaat akissarsitinneqarsimasup Lykkelænder, isummanik pingiliutiinnartakkanik imaqartoq, kalaallinut takutinneqassaaq. Taanna ungasinngitsumi illoqarfinni arlalinni takutinneqassaaq.
Ilitsersuisartoq Lasse Lau kalaallinut isummat pingiliutiinnartakkat pillugit piviusulersaarusiorsimavoq.
Ilitsersuisartup piviusulersaarusiaraluguli takorluikkersaarusiaa filmiliaani taama ittuni siullersaavoq.
Saammaateqatigiinneq
- Lykkelænder Danmarkip Kalaallit Nunaatalu saammaateqatigiinnissaannut suliaraa. Filmi oqaaqqissaariniutitaqanngilaq, oqaluttuarineqarnerali qanorlu misigineqarsinnaanera assigiinngillat.
Nipaannerlu Danmarkip Kalaallit Nunaatalu akornanniittoq kipitikkusussimavara. Taamaammat uanga nammineq isiginnittariaa atortariaqarsimavara – tassa danskinut. Ullumikkut naleqqutinngitsunik kalaalllit pillugit ilisimasakinnermik takorluuinermillu imaqarpoq. Tamanna takutikkusuppara. Taamaammat filmi nuannerpallaanngitsumik imaqarsinnaavoq, aamma filmimi Danmarkip imminut paasinnittariaasianik, immaqalu ilaatigut imminut salloqittaarineranik imaqarsinnaavoq, Lasse Lau filmi pillugu tusagassiuutinut nalunaarummi oqaluttuarpoq.
Ilaatigut inuttaaqataapput Vivi Nielsen, Nukâka Coster-Waldau, Aannguaq J Hansen, Josef Tarrak Petrussen aamma Angunnguaq Larsen.
Ukunani takutinneqassaaq:
- Katuaq Bio, Nuuk: 30. august – 12. september
- Ilinniartitaanermut Aqutsisoqarfik, Nuuk, takutitsineq aammalu ilitsersuisoq Lasse Lau peqatigalugu oqallinneq: 7. september nal. 12.40
- Taseralik Sisimut: 31. August
- Aasiaat 3. og 5. september GUX Aasiaat aamma Aasiaat Katersortarfiat
- Ilulissat Biografen / Sermermiut Kulturikkut illorsuaq: 8. september