Mittarfimmi pisortaasimasoq Air Greenlandimi siulittaasunngorpoq

Kjeld Zacho Jørgensen timmisartortitseqatigiiffimmi siulittaasutut toqqarneqarpoq

Billund Lufthavnemi pisortaasimasoq, Kjeld Zacho Jørgensen, Air Greenlandimi siulersuisunut siulittaasunngorpoq.

Taanna Namminersorlutik Oqartussanit siulersuisunut toqqarneqarpoq, tallimanngormallu ingerlatseqatigiiffimmi immikkut ittumik ataatsimeersuartoqarneranut atatillugu atorfinippoq.

Taanna siulittaasoralugu siulersuisut ataasinngormat inissipput.

Søren Lennert Mortensenip ukioq manna marsimi siulittaasutut ingerlaqqinniarani nalunaarutigimmagu taarsiinissaq pisariaqalerpoq.

Siulittaasuusimasoq unittoq

Sulisut sinniisaat Henrik Steinbacher nalinginnaasumik ataatsimeersuartoqarnerani siulittaasunngorallarpoq, Søren Lennert Mortensenip Naalakkersuisut siulersuisunut ilaasortamik nutaamik toqqaanissaasa tungaanut siulersuisunut ilaasortatut ingerlaqqinnissani kissaatigimmagu, tamannalu tallimanngormat pivoq.

Ukiuni arfineq-pingasuni Billundimi

Kjeld Zacho Jørgensen ukiuni arfineq-pingasuni Billund Lufthavnemi pisortaasimavoq, kisianni ukioq manna maajimi atorfimminit tunuarpoq.

John Dueholm SAS-imi toqqarneqartoq aamma nutaatut siulersuisunut ilaasortanngorpoq, Jan Torberger tunuarnikuummat.

Taamaalilluni Air Greenlandip siulersuisui imatut isikkoqalerput:

  • Kjeld Zacho Jørgensen, Namminersorlutik Oqartussanit toqqarneqartoq, siulittaasoq
  • Bodil Marie Damgaard, Namminersorlutik Oqartussanit toqqarneqartoq
  • Claus Holstein, Danskit Naalagaaffiannit toqqarneqartoq, siulittaasup tullia
  • Bjarne Eklund, Danskit Naalagaaffiannit toqqarneqartoq
  • Leif Rasmussen, SAS-imit toqqarneqartoq
  • John Dueholm, SAS-imit toqqarneqartoq
  • Henrik Steinbacher, sulisut sinniisaat
  • Claus Motzfeldt, sulisut sinniisaat
  • Sam Grønvold, sulisut sinniisaat
Powered by Labrador CMS