Assammik arsartartut kattuffiata taaguutaa allanngorpoq
Kalaallit Nunaanni Assammik Arsartartut Kattuffiat sisamanngornermi tallimanngormat ukiormoortumik naliginnaasumik ataatsimeersuarpoq. Ataatsimeersuarnermi kattuffiup taaguutaa allanngussasoq aalajangerneqarpoq
Ataatsimeersuarnermi kattuffiup maleruagassai ilaatigut nutarneqarlutillu, nunatsinni assammik arsarnerup siunissaa pillugu oqallittoqarpoq.
Siulersuisuni ilaasortat Lars Dahl (aningaaserisuusoq) aamma Dorthea Olsen Rasmussen aappaagu 2019-mi qinigaaffiat killeqarpoq taamatullu siulittaasoq Jørgen Isak Olsenip qinigaaffia.
- Ataatsimeersuartut kattuffiup taaguuteqarnera pillugu taasigamik aalajangiuppaat imatut taaguuteqalissasoq: Timersoqatigiiffiit Assammik Arsartartut Kattuffiat. Nunarsuarmioqatigiinnullu sammitillugu taaneqartassasoq: Greenland Handball Club Federation, siulittaasoq Jørgen Isak Olsen tusagassiutinut nalunaarummi allappoq.
Ilaasortat amerlanerulernissaat
Ataatsimeersuartut aalajangiusimavaat meeqqat inuusuttullu pillugit suliniutit annertusarniarneqarneri suli ingerlatiinnarneqarnissaannik siulersuisut ingerlatseqqissasut. Tassungalu ilanngullugu sineriammi timersoqatigiiffiit ilaasortarisat nukittorsarnissaannut suliniutit.
- Siunissaq pillugu eqqartueqatigiinnermi aalajangiussisoqarpoq peqatigiilluni ataatsimut naapeqatigiinnikkut sammisaq pillugu oqallittoqaqqissasoq tassungalu ilanngullugu unammersuartitseriaatsit pillugit oqallinnissaq, tusagassiutinut nalunaarummi nalunaarutigineqarpoq.
Ataatsimeersuartut siulersuisunut ilaasortanik sisamanik taasigamik ukua qinerpaat:
- Inga Dora Markussen
- Miki Lynge
- Lena Ravn Davidsen
- Axel Lund Olsen