Henrik Fleischer partiimik taarsiivoq
Henrik Fleischerip Partii Naleqqamiit Siumumut nuunnera peqqutigalugu Siumup Inatsisartuni ilaasortaatitai amerlanerulerput. Tamanna taassuma KNR-imut uppernarsarpaa.
Inatsiartunut qinersisoqarneranit qaammatip ataatsip missaa ingerlareersoq Inatsisartunut qinigaarlaat ilaat Henrik Fleischer Partii Naleqqamiit Siumumut ilaasortanngorpoq.
- Ullaaq manna tamanna pivoq. Siumumut ilaasortanngorpunga, Henrik Fleischer ullumi marlunngornermi KNR-imut oqarpoq.
Partii Naleqqami ilaasortaasimasoq qinersisoqarneranilu 143-nit qinerneqarsimasup Sermitsiaq.AG-mut oqaluttuaraa, partiimit tunuarnissani arfininngormat aalajangersimallugu.
- Soorunami inuiaqatigiinnut kusananngikkaluarpoq. Kisianni oqaluttuarisaanermi uangaannaanngilaq, taama iliornikoq. Aamma inatsisinik unioqqutitaqanngilanga, Henrik Fleischer KNR-imut oqarpoq.
Partiiarannguamiilluni suliniarneq assut ilungersunarsimasoq, Siumumilu ilaasortanngornissani eqqarsaatigisarsimallugu,
taassuma Partii Naleqqamit tunuarsimanerminut tunngavilersuutigaa.
- Pisut piartuaarnerini aalajangeriartuaarnera arriitsumik ingerlarusaarsimavoq. Uggornaraluartumillu piffissaa nuanninnginnerpaaffianiikkaluarluni taama aalajangertariaqalerneq allatut ajornarsimavoq, Henrik Fleischer KNR-imut oqarpoq.
Aamma atuaruk: Hans Enoksen: Henrik Fleischer Siumumut nuulerpoq