Assit: Elite Sport Greenland suleqatigiinnissamik isumaqatigiissuteqarpoq

Kattufiit tassaapput Badminton Kalaallit Nunaat, Grønlands Håndbold Forbund aammalu Greenland Taekwon-Do Federation. ESG tamatuma saniatigut KAK suleqatigiinnissamut isumaqatigiissuteqarfigereerpaa.

Elite Sport Greenland tusagassiutinut nalunaarpoq.

- BKN isumaqatigiissuteqarfiginerani Elite Sport Greenland-imut pingaarnerpaavoq BKN nunat tamalaat akornannut appakaannissaa, ukioq manna Kazanimi EM-imut peqataammata nunat tamalaat akornanni akisussaaffimmik kivitsinissaminnut piareersimasut ersersinneqarpoq. BKN-imeersut anguniagaqarnerminni takutippaat nunat tamalaat akornanni ajunngilluinnartumik takutitsilluarsinnaallutik, ingammik iligiiaarnermi unamminerni. BKN-imi anguniakkat taama aalajangersimatigisut ESG-p tamanna immikkut maluginiarpaa - ersarissumik pingaarnersiuinissaminnut aalajangiinissaminnullu sapiissuseqarnerat soqutiginarpoq, taama oqarpoq Malik Hegelund Olsen, Elite Sport Greenland-imi siulittaasoq.

BKN-imi nuannaarutigineqarpoq BKN aamma ESG siunissami suleqatigiinnissamut atsioqatigiissinnaammata.

- ESG tapersiineratigut ukiuni tulliuttuni 4-ni piginnaanillit sungiusaasullu qaffassarnissaat kiisalu pitsaanerpaat atugassarititaat pitsanngoriarnissaat anguneqarpoq.
BKN-ip Savalimmiormiut Islandimiullu piginnaanilinnut sungiusaasunullu suleqatigiinneq ESG-p suleqatigineratigut naqqaniit siuarsaaneq qulakkeerneqarsinnaanngorpoq.
Kazanimi Ruslandimiittumi pitsaanerpaat angalanerat siulleq pivoq, tassaavorlu angutit iligiikkaarlutik arnallu iligiikkaarlutik Europami pissartanngorniunnermi unammisaqattaarnerat. Aappaagu Sudirman Cup, arnat angutillu akulerullutik nunarsuarmi pissartanngorniunnerat peqataaffigissallugu siunniunneqarpoq, Michael Kleist BKN-imi siulittaasoq oqarpoq.

Assammik arsarnermut pingaarutilik
Pan Am-ertoqarnissaanut nunat tamalaat akornanni periutsit Kalaallit Nunaannut appakkaatsinniarneqartut GHF-ip takutippaa ESG-llu naatsorsuutigaa PanAm-ertoqarnissaa assammik arsarnermut aammalu timersornermut ataatsimut isigalugu nuna tamakkerlugu annertuumik sunniuteqassasoq.

- GHF piukkunnaatilinnik aallussinissaminut ukiuni arlalinni atuuttussamik pilersaarusiorsimavoq, taamaaliornikkut PanAm-ertoqarnerani piumassuseqarnerup annertusarnissaa inuusuttullu akornanni nuna tamakkerlugu assammik arsarnermi ineriartortitsinermik malitseqartussamik tunaartaqarpoq. Siunertaq taanna ESG-p siunissaq ungasinnerusoq eqqarsaatigalugu pilersaarusiaanut naapertuuppoq, taamatullu aamma siunissami uagut Kalaallit Nunatsinniit assammik arsartartunik VM-imut peqataatsinissamut siunertaqarpugut, ESG allappoq.

GHF-imut pingaartuuvoq ESG-lu pisortatigoortumik suleqatigiinnissamut isumaqatigiissuteqarnissaq, siulittaasoq Jørgen Isak Olswn oqarpoq.

- Tiimersornerup tungaatigut pilersaarusiat ukiunut arlalinnut atuuttussat aallaavigalugit suliaqarsinnaanissaq kattuffitsinnut pingaartorujussuuvoq. Angutini nunani allani assammik unammisartuutigut aammalu piukkunnaatillit pisariaqartitatik tunngavigalugit tapersersorneqarnerat GHF-imi nuannaarutigeqaagut. Suleqatigiinnissamut isumaqatigiissut aamma GHF-imut pingaaruteqarpoq imaammat aningaasaliissutit annertunerpaartaasa ilaat timigissarnermut atorneqarsinaammata. GHF-imi siulittaasoq Jørgen Isak Olsen, taama oqarpoq.

Angusarissaarluarusunneq
GTF angusaqarluarusussuseqarluinnartuuvoq, tassa unamminerit peqataaffiusut tamarmik ujaminnaffiunissai anguniagaasarput. Sukataartariaqarpoq aammalu siunertaqarluni iliuuseqartariaqarpoq GTF-imilu tamanna ilisimaarilluarpaat.

- GTF ersarissumik siunissarlu ungasinnerusoq eqqarsaatigalugu pilersaarusiorsimapput taamaammat kattuffik qanoq angusaqarniarnersoq qanorlu angusaqarniarnerminut periusissaqarnersoq takuneqarluarsinnaavoq, Malik Hegelund Olsen taama oqarpoq.

- Taekwon-Do-tarnerup iluani sukkasuumik ineriartorneq pissutaalluni Elite Sport Greenland suleqatiginissaa GTF-imut pingaarpoq. Taamaattumik siunissaq ungasinnerusoq eqqarsaatigalugu suleqatigiilernissaq uagutsinnut ineriartornissamik periarfissiivoq, taamaasilluta nunat tamalaani unammisartut naligilersinnaavagut taama oqarput Angutinnguaq TIttussen GTF nunani allani unammisartut sungiusaasuat aammalu GTF-imi siulittaasoq Bolethe Stenskov.

Siunissaq
Piukkunnaatilinnik aallussinermi timersortartullu pitsaanerpaat ineriartortinniarnerini suleqatigiinneq Elite Sport Greenland-ip pingaartilluinnarpaa, tamaattumik siunissaq ungasinnerusoq eqqarsaatigalugu kattuffiit suleqatigiinnissamut isumaqatigiisiorfigineri ESG-p nuannaarutigilluinnarpaa.

- ESG suleqatigiinnissamik isumaqatigiissuteqarnikkut piukkunnaatilinnik aallussinermi avatangiisinik pitsaanerusunik aammalu timersortartunik pikkorivissunik ineriartortitsinissamut pilersitsinissamik kiisalu siunissami anguniakkamik toraagaqarluni suliniuteqaqataanissaminnik kissaateqarput - taamaammat Go for it!