Mittarfittaassat: Mittarfeqarfiit aningaasalerneqarnissaat pisariaqassaaq

Nuummi, Ilulissani Qaqortumilu mittarfiliortoqassappat Mittarfeqarfiit ukiumut 60 million koruuninit 75 million koruunit pallillugit aningaasalerneqartarnissaa pisariaqalersinnaavoq.

Deloittep misissuinermini taamatut inerniliussaqarpoq.

Mittarfiliornissat pillugit Inatsisartut ataatsimiilerpata toqqaannanngikkaluamik Mittarfeqarfiit aningaasalerneqartalernissaat eqqartorneqassaaq. Toqqaannartumilli aalajangiinerit kingusinnerusukkut aatsaat aalajangiiffigineqartussaapput.

Kangerlussuaq aamma Nuuk aningaasaliisassapput
Nuuk Kangerlussuarlu sinneqartoorfiusarneri pissutaavoq, mittarfiit sinneri annaasaqaataaffiusarlutik.

Nuuk Kalaallit Airportsimit ingerlanneqalissappat Kangerlussuarlu nunanit allanit miffigineqartarunnaarpat, taakkunani sinneqartoorutaasartut annaaneqartussaapput, amigartoorfiulersinnaallutik, Deloitte allappoq.

- Mittarfeqarfiit sinneqartoorutaasa sineriammi qulimiguulinnut amigartoorfiusunut matussusiisarput, ilaatigut oqaasertaliisoqarpoq.

Kangerlussuaq aamma Narsarsuaq qulimiguulinnut mittarfinngussappata ukiumut 60 million koruuninik amigartoorfiusalersinnaapput. Kangerlussuup mittarfia 1.500 meterinngortinneqassappat amigartoorutit ukiumut 75 million koruuniusalersinnaapput.

Aalajangiinissat
Mittarfiliornissat pillugit Inatsisartut ataatsimiilerpata eqqartorneqassanngilaq siunissami Mittarfeqarfiit qanoq aningaasalerneqartassanersut.

- Mittarfeqarfinnut suliffeqarfimmut pilersaarummik nutaamik inaarutaasumillu innersuussinissaq, Inatsisartut inatsisissaannut siunnersuutip matuma avataaniippoq. Mittarfeqarfinnut suliffeqarfimmut pilersaarummut nutaamut inaarutaasumullu, taassumalu aningaasalersorneqarnissaanut, allaffissornikkut politikkikkullu oqaloqatigiinnerit aalajangiinerillu arlallit apeqqutaassapput, oqaluuserisassamut ilaatigut nassuiaasoqarpoq.

Nuummi, Ilulissani Qaqortumilu mittarfiliortoqarnissaa Kalaallit Nunaannut pitsaanerpaassasoq Deloittemit nalilerneqarpoq.