Tasiilaq: Imerniartarfiutilik kommunimit politiinut tunniunneqarniarpoq

Suliffeqarfimmi Kiffartuussivik maajip aallaqqaataani 2018 Tasiilami Politeeqarfimmit, Sermersuumi Politiinit, nalunaarutiginnissummik tigusaqarpoq, Tasiilami 28. aamma 29. marsi 2018 Diskotekimi aammalu Krostuenimi arlalinnik pisimasoqarnerata kingunerisaanik.

Kommuneqarfik Sermersuumi Aningaasaqarnermut Inuussutissarsiornermullu Ataatsimiititaliami ullumi oqaluuserineqartussami tamanna atuarneqarsinnaavoq.

Kommuni: Unioqqutitsisoqarpoq

- Imigassaq pillugu inatsimmik unioqqutitsisoqarsimanera pillugu Politiit namminneq suliamik aallartitsisimanngillat. Kisianni inatsisilerituumik avataaneersumik naliliisitsereernerup kingunerisaanik Suliffeqarfimmi Kiffartuussiviup imatut paasivaa, unioqqutitsinerit ima sakkortutigimmata allaat akuersissummik piginnittumut, aammalu unnuk taanna akuersissummik
aqutsisumut kinguneqartitsisoqartariaqartoq, oqaluuserineqartussami allaqqavoq.

Suliffeqarfimmi Kiffartuussiviup nalilerpaa unioqqutitsinerit pillugit Politiinut nalunaarutiginnittoqarnissaa inissaminiittoq. Suliamut tassunga atatillugu Politiit kisimiillutik oqartussaasutut akiliisitsisinnaatitaapput. Taamaammat kommunip tungaaniit iliuuserisinnaasaq tassaavoq Politiinut nalunaarutiginninnissaq.

Unioqqutitsinerit

- Marsip 28-ani 2018 politiit Tasiilami Diskotek aamma Krostuen alakkarterpaat. Politiit ulluinnarni akuersissummik aqutsisumut saaffiginnissuteqarput, taanna oqarmat, imerniartarfik nal. 03.00
matuniarlugu eqqarsarlutik, pissutigalugu ulloq taanna tallimanngornertut isigigamikku, tassami aqaguani sisamanngorneq illernartoq nalliuttuusussammat.

Tamanna pereermat politiit ulluinnarni akuersissummik aqutsisumut ilisimatippaat, pingasunngorneq pineqartoq ulluinnartut nalinginnartut isigineqartoq, taamaattumillu imerniartarfik nal. 24.00 sassaalliiunnaassasoq, kingusinnerpaamillu akunneq ataaseq qaangiuppat matussasoq.

Imigassaq pillugu inatsimmi aalajangersakkanik unioqqutitsineq, aqutsisoq ilitsersorpaat, matulivinnermi "amerlasuunik sassaalliisoqassanngitsoq" (inummut ataatsimut amerlasuunik imigassanik kimittuunik pisititsisoqassanngitsoq).

Politiinut suliassanngortitsineq

Unnuaq taanna marsip 29-at 2018 nal. 00.10 politiit imerniartarfinnut saaffiginnissuteqaqqipput.

Nakkutilliilluni angalaarnermi politiit imigassaq pillugu inatsimmi imaattunik unioqqutitsisoqartoq paasivaat:

• Imerniartarfik nal. 24.00 kingorna sassaalliiginnarpoq, naak politeeqarfimmi ittuusup ulluinnarni akuersissummik aqutsisumut sakkortuumik peqqussutigigaluaraa nal. 24.00 kingornagut sassaalleeqqittoqassanngitsoq.
• Sassaalliinerup unitsinneqanngilaattaani ”annertuumik sassaalliisoqarsimavoq”. Politiit paasivaat, nerrivinni immiaaqqat imallit amerlasoorpassuusut.
• Sassaalliisoqarnera imerniartarfiup toqqorterniarsarigaluarpaa Krostuen parnaarlugu, inunnik ulikkaartoq barimi pingasunik sulisulerlutik.
• Imerniartarfik immiaaqqanik angerlaassassanik pisititsisimavoq. Politiit takuaat arnaq qaatiguunik inaaliisarfimmi qaatiguulerluni arfinilinnik immiaaraaserluni tassaniittoq.
• Sulisut arnaq aalakooqaluni isaarissami natermi sinittoq ikiornianngilaat.

- Suliffeqarfimmi Kiffartuussiviup siunnersuutigaa, akuersissummik piginnittoq ullunik 30-nik piffissalerlugu politiit nalunaarutiginninnerannut oqaaseqarsinnaatitaassasoq. Peqatigitillugu akuersissummik piginnittoq nalunaarfigineqassaaq, nalunaarutiginninneq pillugu oqaaseqarsinnaanissaminut pisussaaffeqanngitsoq.