Mittarfiit nutaat: Narsarsuup heliportinngortinneqarnissaa sulissutaavoq

Kangerlussuaq Narsarsuarlu suluusalinnut mittarfittut atorunnaarsinneqarnissaat sulissutigineqalerpoq.

- Mittarfinnik annertusaanermi inuiaqatigiinnut aningaasaqarnikkut sunniutaasussanik nalilersuinerup ersarissumik takutippaa, Ilulissani, Qaqortumi aamma Nuummi nutaanik mittarfittaarnermi mittarfiit ilusiligaaneranni nutaami aningaasaliinissaq, inuiaqatigiinnut iluaqutissartaqarnerpaajusoq, siunnersuummi atuarneqarsinnaavoq.

Periarfissat marluk misissorneqarput. Siullertut Kangerlussuaq aamma Narsarsuaq heliportitut atuutilernissaat imaluunniit Kangerlussuarmi mittarfik 1.500 meteritut atulernissaa. Mittarfittulli tamarmik atorunnaarpata aningaasaqarnikkut Nunatsinnut pitsaanerpaajussaaq.

- Periarfissatut ilusiliaq alla 1-imi maannakkut naliusoq sinneqartoorfiulluni 280 mio. koruuniulluni, siunnersuummi atuarneqarsinnaavoq.

Kangerlussuaq mittarfittut atorneqaannassaguni 241 million koruuninik annaasaqarfiussaaq, ilisimatitsissutigineqarpoq.

Narsarsuup mittarfia allanngortinneqassanngitsoq kisianni heliportitut kisimi atorneqarnissaa siunnersuutigineqarpoq.

Taamaattoq erseqqissumik oqaatigineqanngilaq Kangerlussuaq aamma Narsarsuaq qanoq ilineqassanersut.

- Kangerlussuup aamma Narsarsuup atorneqaannarnerisa annertussusaa sunniutaasussallu suleqatigiissitaliani marlunni Namminersorlutik Oqartussanit, Qeqqata Kommunianit aamma Kommune Kujallermit ilaasortaaffigineqartuni, qulaajaavigineqassaaq. Kangerlussuarmi aamma Narsarsuarmi mittarfiit siunissami atorneqarnissaannut ingerlanneqarnissaannullu pilersaarummik inaarutaasumik innersuussinissaq, siunnersuutip matuma avataani inissisimavoq.

Suluusalinnik mittarfiliornissat pingasut sanaartorneqarnissaat Nunatsinnut pitsaanerpaajusoq aamma erseqqissaatigineqarpoq.