Mittarfissat misissoqqissaarneqarnerani takornariaqarnikkut periarfissat ilanngunneqanngillat
Attaveqaqaigiinnermut Naalakkersuisoqarfiup tallimanngormat saqqummiussaani, Deloittep takornariaqarnikkut periarfissat inuiaqatigiit aningaasaqarnerannik misissueqqissaarnermini ilanngullugit naatsorsorsimanngilai.
‘’Assersuutigalugu takornariaqarnerup annertusinerata pitsaasumik sunniutai naatsorsoruminaatsorujussuummata. Taakku sunniutit qinigassani allani naleqarnerulersitsisinnaapput’’, tamanna tunngavilersuutigineqarpoq.
Isumassarsiatsialak
Ataatsimut isigalugu maanna mittarfeqarnerup ilusaa attatiinnarneqarneranit pitsaanerusumik sunniuteqartussaammata, nutaanikpingasunik mittarfiliornissaq inuiaqatigiit aningaasaqarnerannut isumassarsiaq pitsaasuusoq, Deloittep nalunaarusiaani oqaatigineqarpoq.
Tassani periarfissanik marlunnik misissuisoqarpoq, aappaani Kangerlussuaq aamma Narsarsuaq qulimiguulinnut mittarfinngortillugit, aappaanilu Kangerlussuarmi mittarfiup 1.500 meterinut millisinneqarnissaa.
Taakku periarfissat marluk nalingisa assigiinngissusaat milliardit affaannit amerlanerupput, periarfissaq siulleq iluanaarfiulluni, periarfissap aappaa amigartoorfiulluni. Aningaasaqarnikkut missingersuutitigut nunap karsia aningaaanik suliniummut immikkoortitsisimanngitsoq, Deloitte allappoq.
Periarfissaq allannguutaasinnaasoq
Saqqummiussami periarfissaq allannguutaasinnaasoq taamaalilluni Kangerlussuarmi mittarfiup siunissaanut tunngavoq, piffissamilu tulliuttumi annertuumik oqallisigineqarnissaa ilimanarpoq.
Nalunaarusiami tikkuarneqartutut politikerit akileraarutinik qaffaassanerpat, taamaalilluni Kangerlussuup qulimiguulinnut mittarfinngunngitsoortinneqassalluni, imaluunniit mittarfik allatigut aningaasaliiffigineqarnissaanut aaqqiissutissaqartoqarnerluni, taamaalilluni siunissaqarluni takornarissat amerlasuut tikittalissanerpaat.
Kim Kielsenip siornatigut Sermitsiaq.AG-mut oqaatigereerpaa, mittarfiup takornariaqarnikkut tikinneqarluartalernissaata tungaanut, niuerpalaartumik ingerlanneqarsinnaanngornissaata tungaanut amigartoorutaasinnaasut matussusertarniarlugit.
Aqqusineq nutaaq aamma akeqarpoq
Qeqqata Kommuniani borgmesteri Siumumeersoq Malik Berthelsen siuttoralugu, Kangerlussuup mittarfiata siunissaa ilungersuutigineqarpoq, tassami kommunip takornariaqarneq ineriartortissaguniuk mittarfik qitiusumik inissisimasutut isigineqarmat. Sisismiut aamma Kangerlussuup akornanni aqqusinissamut nutaamulli kommuni aningaasaliissutissaqareerpoq.