Aningaasaateqarfinnit aningaasanik ima pissarsisinnaavutit
Aningaaseqarfippassuit aningaasaatinik ulikkaarput, taakku suliniutinut nutaanut soqutiginartunullu agguaanneqarnissaaminnut utaqqipput. Sulisartut Højskoliat pikkorissarnermik maanna ingerlatsilerpoq, tamatuma suliniutit takorluukkat piviusunngornissaat qulakkiissavaa.
Ulluni pingasuni pikkorissarnikkut Qaqortumi højskolip aningaasaateqarfinnit aningaasanik pissarsiniarneq ukkataritinniarpaa, peqataasut taamalillutik avataanit aningaasaliissutinik pissarsinissamut piareersarniassammata.
Nunatsinnut tulluarsagaq
Danmarkimi aningaasanik pissarsiortartut ilisimasaqarnerpaasa ilaat, Lotte Jensen, suliffeqarfimmik Up Frunt Europemik piginnittoq højskolip aggersarsimavaat. Taanna ukiuni 28-ni tamanna sammisaq suliaqarfigisimavaa, suliniutinillu pilersitsisartorpassuarnik kisissaanngitsunik pikkorissaasarsimavoq, ilaatigut Ilisimatusarfimmi ilisimatusartunut.
- Peqataasut aningaasaateqarfiit soqutiginartorpassuit aamma tapiisarnermut aaqqiissutit Kalaallit Nunaanni suliniutinut tapiinissamut soqutiginnittut paasisaqarfigissavaat, Lotte Jensen Sermitsiaq.AG-mut oqaluttuarpoq.
Attaveqartut
Kalaallit aningaasaliisarfiisa saniatigut, aningaasaateqarfiit allat Kalaallit Nunannut atassuteqartut sammineqassapput: Bikubenfonden, Lokale og Anlægsfonden, Realdania, Aage V. Jensen Charity Foundation, A.P. Møller Fonden, 15. Juni Fonden, Villum Fonden aamma Mary Fonden. Tamatuma saniatigut ilaatigut Augustinus Fonden aamma Kongehusets Fonde ilaapput, taakku Kalaallit Nunaat aningaasaateqarfiup aningaasaataanik ineriartortinnissaanik isiginiagaqarput.
Danskit aningaasaaateqarfii kisimik pikkorissarnermi ukkatarineqassanngillat. Suliniutillu eqqortut Nunat Avannarliit Siunnersuisoqatigiivinit, EU-mi aningaasaateqarfinnit aamma Canadami USA-milu aningaasaateqarfinnit tapiiffigineqarsinnaapput.
Suliniutip nassuiarneqarnera
- Avataanitaningaasanik suminngaanniit pissarsiniarnissap ilisimanissaa kisimiinngilaq, aappaattut suliniutip pitsaasup suuneranik paasinnissinnaaneq aamma suliniut qanoq pilersaarusiorneqarlunilu ersarissumik nassuiarneqarnissaa pisariaqarpoq. Tamanna sammillugu suliaqarfigissavarput, Lotte Jensen oqarpoq.
Pikkorissarneq inunnut siammasissumik kommunineersunut, ilinniarfeqarinneersutut, kulturikkut suliaqartunut, isumaginninnermik suliaqartunut aamma inunnut isumassarsiamik aallutaqartunut saaffiginnittuuvoq.
Arfineq-marluk peqataanissamut nalunaareerput, pikkorissarnerlu maajip 28-annit 30-annut ingerlanneqassaaq.