Sukataarussiniarluta peqataavugut

Kalaallit Nunaat, Arctic Winter Games Canadami South Slavemi ingerlanneqarnerani volleyballertartunik iligiinnik marlunnik peqataatitaqarpoq.

Sermitsiaq.AG-ip 15-inik ukiulik Aila Guldager aamma Helge Larsen 17-inik ukiulik Maniitsuminngaanneersoq oqaloqatigisimavai.

Nunatsinni arlalinnik unammisoqartanngilaq, taamaammat unammisartut AWG-imi arlaleriarlutik unamminissartik qilanaarutigisimavaat.

Ataqqeqatigiinneq unammilluarnerlu

- Tamaani unammisartoqatigiit pitsaasut naapissimavagut. Peqataanermi siuaqqaneq apeqqutaatinnagu unamminerup naamminissaa tikillugu sukataarussisarneq pitsaaqqutigaa. Ajoraluartumilli uagut suli unamminngilagut, Aila Guldager oqarpoq.

Ukiuuneranilu unammiuaarnerni takutitsilluarsuppoq:

- Uangali ataqqeqatigiinnermik unammilluarnermillu takutitsinnissaq aamma pingaartippakka, taanna oqarpoq.

Nukappiaqqat unammisartuini aqutsisoq Helge Larsen Arctic Winter Games aappassaanik peqataaffigaa. Nukappiaqqat kingullermik AWG ingerlanneqarmat sassinngorput.

- Unammisartoqatigiit Canadaminngaanneersuut nukittoorujussuupput, taamaammat unamminerat isiginnaarlugit ilinniarfigilluartarpagut. Ukiunili kingullerni marlunni unamminerni suut eqqumaffigissanerlugit ilisimanerulerlugit ineriartungaatsiarsimavugut, taanna oqalutuarpoq.

Arlalinnik ikinngutitaarsimasut

- Ukiut marluk matuma siorna sassinngorpugut. Tamatuma kingorna sungiusangaatsiarsimavugut, massakkulli suleqatigiilluarsinnaanerulerlutali ataqatigiinnerulersimavugut. Soorunami uagut aamma kukkusarpugut. Taamaammat arlaleriarlunga unamminissara qilanaarisimavara Arctic Winter Gamesimilu qanoq angusaqarnissaq aamma pissagassutigalugu, Helge Larsen erseqqissaavoq.

Aila Guldagerip Hay Riverimiinnini assut nuannaraa.

- Nunatsinneersunik nunanillu allaneersunik arlalinnik ikinngutitaartorpunga. Futsalertullu isiginnaarpagut. ‘Hand games’-erlungalu aamma assut nuannaraara. Dene Games-imi peqataasut najugaqatigaagut, taannalu unammissutigiuaannarparput, Aila Guldager oqarpoq.