Futsalertartut qiimasut: Ajorsarnaveersaassaagut
Sermitsiaq.AG-ip futsalimik unammisartut Aiko Nielsen aamma Romeo Blidorf oqaloqatigisimavai. Taakku Arctic Winter Gamesimi semifinalerlutik sooq ajorsarusunnginnerat atuaruk
- Ilaqutakkalu Real Madridimut illersuisartuuvugut, massakkulli Asensio nuannaartorinerpaavara.
14-inik ukiulik futsalertartoq Aiko Nielsen Nanortalimmiu taama oqarpoq. Saniani nikorfavoq 13-inik ukiulik Romeo Blidorf. Taassuma tuluit nunaanni peqatigiiffik Manchester United illersortarpai.
- Marcus Rashford nuannaartorinerpaavara, Romeo Blidord kina nuannaartorinerpaaneraa apeqqut pillugu akivoq.
Nutaanik ikinngutitaarneq
- Arctic Winter Games peqataaffigalugu qanoq ippa?
- Nunatsinni ulluinnarni pilikattorujussuuvunga. Toqqarneqarsimallunga paasingakku nuannaaqaanga. Pilikareertigalunga soorlu maani pilikanneruliinnarlunga, Aiko Nielsen illarpoq.
- Tamaaniilluni assut nuannerpoq. Nunavummeersunik ikinngutitaarpunga – oqaasii oqaatsitsinnut eqqaanartorujussuupput, Romeo Blidorf akivoq.
Taakku ataasinngormat U-14-imi unammisartoqatitillu unammipput, Albertamulli 5-1-mik ajugaanerminni taakku tamarmik ataatsimik isertitaqarput.
Sapinngisartik tamaat ajorsarnaveersaarusuttut
- Unammineq nuannerpoq, unamminerullu nalaani stressileraluarpunga, tassanilu mianersoqqussummik tunineqarlunga, Aiko Nielsen oqaluttuarpoq.
Semifinalissangaluarunilli ajorsarfiginaveersaarusuppaat.
- Unammisartoqatigiilluta isumaqatigiissutigaarput semifinalimi ajorsarutta qapissalluta. Taamaammat ajugaanissaq tamaviaarlunga sukataarutissavara. Qaperusunngilagami, Aiko Nielsen oqarpoq illarlunilu.