Futsalertartut nukarliit AWG-mi pitsaanerit pingasut akornanni inissikkusuttut
Niviarsiaqqat futsalertartut nukarliit Arctic Winter Gamesimi unammeqqaarnerminni qularnaatsumik ajugaapput
10-1.
Niviarsiaqqat futsalertartut nukarliit Arctic Winter Gamesimi ulluni makkunani Candami ingerlanneqartumi, unammeqqaarnerminni taama angusaqarput.
U-14-it sungiusaasuata Knud Olsenip unammisartut unamminermi takutitaat nuannaarutigaa.
Pissagallutik aallartittut
- Aallartilluarnerput ingerlateqqissavarput. Unammisartut tamarmik tupaallaatissaanngitsumik unammineq aallartimmat pissagapput, unamminerulli immikkoortuata aappaani eqqissimanerusumik unammilerput unamminerlu qularutissaanngitsumik ajugaaffigalugu, sungiusaasoq unamminerup kingorna Sermitsiaq.AG-mut oqarpoq.
Unamminermi Asii Berthelsen arfineq-pingasoraarluni immikkut taasassaavoq.
- Asii Berthelseni unammisartuutigalugu soorunami nuanneqaaq, isikkamilli arsaanneq iligiit arsaattarput, taamaammat unammisartut tamarmik unamminerup naammasinissaa tikillugu sukataarussissapput, taanna oqaluttuarpoq.
Piumassutsimik takutitsissasut
Unammisartoqatigiit Arctic Winter Gamesertoqarnerani medaaliamik pissarsinissaq anguniangaraat.
- Pissartanngornissarpulli soorunami neriuutigaarput. Sungiusarnerni unammisartunut oqaatigiuarsimavara pitsaanerit pingasut akornanni inississasugut. Piumassutsimik takutitsinissaat anguniarlugu taama iliorsimavunga, Knud Olsen oqarpoq.
Sermitsiaq.AG-p unammisartoq pikkorilluinnartoq Asii Berthelsen pillugu ulluni qaninnerni allaaserisaqassaaq.
Aajuku U-14-ni futsalimi peqataasut:
- Mona Jensen
- Asii Kleist Berthelsen
- Juliet Egede
- Freja Fredriksen
- Aili H. Platou
- Marie Broberg
- Arnannguaq Olsen
- Iluuna Jensen
- Karla Mørch