Suliumajunnaarneq timmisartuussinissamik eqquisinnaasoq
Danmarkimi suliumajunnaartoqassappat silamik ilimasaarummik amigaateqarneq pissutigalugu nunap iluani timmisartuussinissat tamarmik eqqugaasinnaapput
Danmarkimi suliumajunnaartoqassangaluarpat DMI-mit silamik ilimasaarutinik amigaateqarlernissaq pissutigalugu timmisartuussinissat tamarmik eqqugaasinnaapput. Kommuninut, Nunaqarfinnut, Isorliunerusunut Attaveqatigiinnermut Ineqarnermullu naalakkersuisoqarfik taama paasissutissiivoq.
De manglende vejrudsigter fra DMI kan lamme lufttrafikken i tilfælde af en strejke i Danmark. Det oplyser Departementet for Kommuner, Bygder, Yderdistrikter, Infrastruktur og Boliger.
DMI-p Naalagaaffeqatigiinnermi timmisartuussisunut immikkut silasiortui, TAF-mik taaneqartartut, suliumajunnaartinneqartussanut ilaapput. Mittarfik TAF-mik peqanngippat taava Air Greenland silamik ilimasaarisinnaasunik marlunnik mittarfinnik tikitassaqarsinnaasariaqarpoq.
- Taamaammat TAF atorneqartinnagu Kalaallit Nunaata iluani timmissartuussinissaq ajornakusuussaaq. Taamaasilluni timmisartuussinissat tamarmik unitsinneqartariaqassapput, Air Greenlandimi timmisartuussinissamut pilersaarusiorneq pillugu inatsisinik atuutitsinnaajunnaassaaq, naalakkersuisoqarfiup pisortaa Ruth Lindhardt paasissutissiivoq.
Ilanngunneqannginnissaq neriuutigineqartoq
Kangerlussuarmiit Danmarkimut suli timmisartuussisoqarsinnaassaaq. Nunalli iluani timmisartuussinissamik taamaatitsinissaq isumassaqanngilaq.
Ruth Lindhardtip oqaluttuaraa, pisoq pillugu Naalagaaffik ilisimatinneqarsimasoq, taamaasiornikkut DMI-mi sulisut ilaat suliumajunnaarnissamut peqataatinneqannginnissaat, neriuutigineqarpoq.
- Isumaqatiginninniarnermilu DMI-mi sulisut ilaat suliumajunnaarnermi peqataannginnissaat Naalagaaffiup iluatsissinnaanngippagu, Kalaallit Nunaanut annertuumik kingunerluuteqarsinnaavoq.
Suliumajunnaarnerup 4. april aallartinnissaa siorasaarutigineqarsimavoq. Taamaakkaluartoq marloriarluni ulluni 14-inik kinguartinneqartarsinnaavoq. Tamanna isumaqatiginninniartartup suliumajunnaarnissamik kinguartitsineratigut pisarpoq. Taamaammat illuatungeriit isumaqatigiissimanngippata 18. april imaluunniit 2. maj suliumajunnaartoqalersinnaavoq.