Attornagu: Prins Henriup assinga nivingaannassaaq
Sakkutuut imarsiortut umiarsuaat tamarmik dronnign Margrethep aamma prins Henriup assinganik nivingasoqarput - assersuutigalugu igaffiani. Kisianni prins Henrik ilisaareermat qanoq pisoqassava? Henriup assinga peerneqassava?
Issittumi Sakkutooqarfiup kunngikkormiut pillugit akunnattooruk iluarsiivigeqqammerpaat.
Umiarsuarmi alapernaarsuummi nutaami ‘’Lauge Koch’’-imi iikkami dronning Margrethep aamma prins Henriup assinganik nivingasoqarpoq.
Umiarsuarmi pisortaq nalornisoq
Sermitsiaq.AG ullut qulit matuma siorna umiarsuarmi alapernaarsuummi nutaaliaasumi takornariartinneqarmat, umiarsuup naalagaa Claus L. Gudbjerg, prins Henriup assinga nivingaannassanersoq nalornisorujussuuvoq.
- Københavnimut apeqquteqaammik nassiussinikuuvugut, qanoq iliornissatsinnik iliunnginnissatsinnilluunniit nalunaartoqarnissaa utaqqivarput, umiarsuup naalagaa marsip tallimaanni ilisimatitsivoq.
Aalajangiineq
Ullut arlaqanngitsut qaangiummata – marsip arfineq-pingajuanni – aalajangiisoqarpoq, naalagaaffiup oqartussaqarfiinut kunngikkormiunik assitaqartunut allagaq nassiussorneqarluni.
- Assilissat nivingaannassapput, allamillu iliuuseqartoqassanngilaq, dronningip illersornissaqarfimmut atassuteqaataanit paasissutissiinermi tamanna oqaatigineqarpoq.
Umiarsuaq imaluunniit allaffik nutaaq kunngikkormiunik assitaqartoq atulersillugu, ima oqartoqarpoq:
Pisariaqartitsineq nutaaq
- Assinik nivinngaasoqarnissaanik pisariaqartitsisoqalerpat, dronning Margrethep assinga kisimi nivinngarneqassasoq pissusissamisoortuinnaassaaq, peqqussummi tamanna oqaatigineqarpoq.
‘’Lauge Koch’’-imi inuttat aamma naalagaaffiup oqartussaqarfippassuisa prins Henriup toqoreersup assinganik taamaalillutik piigaqassanngillat, taanna kunngeqarfimmi allaffinni hunnorujulikkaani assiutigineqarpoq. Sumiiffiillu ilaanni aamma qalipaammut aningaasanik sipaartoqarneranik aalajangiineq kinguneqarpoq, tassami Henriup assinga peerneqaraluarpat assip inikua qaqortuinnaassagunarmat.