Assit takukkit: Kalaallit sisorartartoqatigiit DM-imi arlalinnik ujaminnattut
Uani sapaatip-akunnerani sisorartartut peqatigiiffii marluk Nunatsinneersut Norgemi DM-ertoqarneranut peqataatitaqarput. Sisorartartut ilaat ujaminnassimallutik angerlassapput
Sisorartartut peqatigiiffii SSP Alpin Sisimiut aamma NS-84 Nuummeersut sangusaarluni Norgemi sisorartarfimmi Hafjellimi DM-ertoqarneranut arlalinnik peqataatitaqarput.
SSP Alpin Sismiuuneersut 13-inik peqataatitaqarput, qulingiluanik ukiulinniik misilittagartuunut 31-t sinnerlugit ukiulinnut peqataatitaqarlutik. SSP Alpinimi siulittaasoq, Ivalo Lennert, timersoqatigiiffik qulinik ujaminnattoq ilisimatitsivoq.
Inersimasut ujaminnattut
Krister Støvlbæk SSP-meersoq ilaatigut Super G-mi, sangusaapiloornermi aamma parallel-slalomimi angutini veteranini kuultinnappoq.
Mette Bourup aamma Hansa Simonsen SSP-meersut juniorini 21-it ataallugit ukiulinni unammeriaatsini assigiinngitsuni aappaa sølvinnalluni aappaa bronzennappoq. Maja Olsen 18-it ataallugit ukiulinnut peqataalluni sangusaarnermi sølvinnappoq.
- Meeqqat DM-imi ujaminnanngitsoorput, kisianni peqataaneq misigisaqarfittut tiguarput, SSP Alpin Sisimiut siulittaasua, Ivalo Lennert oqarpoq, ukiuni arlalinni SSP peqataatitaqarsimanngitsoq taassuma saniatigut ilisimatitsissutigaa.
Pitsaassusaa tupaallaatigigaat
Una angalaneq timersoqatigiiffiup meerartaasa inuusuttortaasalu DM-imi unammisanut sanilliullugu pitsaassusaat qanoq inissisimanersoq paasiniarlugu atoritsik, taassuma oqaatigaa.
- Peqataaneq meeqqanut uisitsivoq, danskit pissartanngorniunneranni pitsaassutsip qaffasissusaa tupaallaatigisorujussuuaat, Ivalo Lennert oqaluttuarpoq.
SSP-p sisorartartuutini tamaasa DM-imut peqataatitaqarnissaat neqeroorutigineqarsimasoq taanna ilisimatitsivoq, tassami timersoqatigiiffik kilisaataatilimmit Ice Trwlimit ukiuni pingasuni atuuttussamik aningaasaliiffigineqarsimagamik. Kisianni angalaneq akisummat, aappaagu DM-ertoqarnerani peqataasut ikinnerujumaartut erseqqissaatigaa.
NS-84 arlalinnik ujaminnattoq
NS-84 Nuummeersut peqataatitaat aamma DM-imi arlalinnik ujaminnapput.
William Haggæussen NS-84-imeersoq ilaatigut angutit inersimasut Super G-mi unammineranni sølvinnappoq, taanna danskimit OL-imut peqataasumit Christoffer Faarupimit sekundinik 7-nik kingulliulluni apissippoq.
Qooqu Chemnitz Berthelsen aamma Nukakkuluk Haggæussen, parallel-slalomimi angusarissaarput, ukioqatigiiaani 16-t ataallugit ukiulinni aappaa kuultinnappoq, aappaalu sølvinnappoq.
Niviarsiaqqani 14-it ataallugit ukiulinni aamma Inuuna Chemnitz Berthelsen taaneqarsinnaavoq, taanna unamminerni assigiinngitsuni sølvinnallunilu bronzinnappoq.
Meeqqani qulit ataallugit ukiulinni Ikuala Nielsen ilaatigut parallel-slalomimi aamma bronzinnappoq.
DM-imi angusat tamaasa uani takukkit