Siorarsiorfik
Illoqarfiup ineriartortinnissaanut pilersaarut kommunimut akiligassarpassuaqalersitsisoq
Frederikssundimi Vingemi illoqarfiup ineriartortinnissaanut pilersaarut, Siorarsiorfimmut isumassarsiorfiusimasutut taaneqartoq, aningaasatigut ajornartorsiortorujussuuvoq
Frederikssundimi illoqarfiup ineriartortinnissaanut suliniuterujussuaq, Kommuneqarfik Sermersuumi kommunaldirektørip Lars Møller-Sørensenip Siorarsiorfimmut pingaarutilimmik isumassarsiorfiusimasutut oqaatigisimasaa, kommunimut akiligassarpassuaqalersitsisimavoq.
Taamatut allappoq Sermitsiaq.
Tamatuminnga paasinnissimavoq DR København, taassumalu allaaseraa kommunip massakkorpiaq 163 millioner koruunit amigaatigigai, illoqarfiup immikkoortuani Vingemi sanaartorfissanik tuniniaanikkut naatsorsuutigineqarsimasutut isertitaqartoqannginnera pissutigalugu.
Kommunip naatsorsuutigisimavaa aningaasat taakkua 2017-imi isertikkumaarlugit, taamaasilluni aningaasat karsimut suli ikinngitsulluunniit atorneqareersimapput. Tamatuma saniatigut isumaqatigiissutini arlalinni tunngaviusumik pissutsit ilaat inatsimmut naapertuuttuunersut qularnartoqartinneqarpoq, kiisalu allattaavimmut eqqortumik nalunaarsuisarneq unammilligassartaqarsimalluni, DR København qulaajaavoq.
Kommuneqarfik Sermersuumili kommunaldirektørip Lars Møller-Sørensenip Siorarsiorfiup kommunimut taamatut akiligassarpassuaqalersitsinissaa ernumanartoqartinngilaa.
– Qallunaat kommuuniisa aningaasaqarnerat oqaaseqarfigineq ajorpavut, oqarsinnaavungali Vinge Siorarsiorfimmut isumassarsiorfiit ilagisimagaluaraat uagut suliniuterput allaanerujussuuvoq, tunngavissagissaarnerujussuullunilu. Siorarsiorfimmut suliniummi sanaartorfinnik tuniniaanissaq tunngavissat ilaginngilaat, suliniummillu isertitassanik missingersuuteqarsimanngilagut – akerlianik aningaasartuutissanut missingersuusiorsimavugut, Kommuneqarfik Sermersuumi kommunaldirektøri Lars Møller-Sørensen oqarpoq.
Tamanna pillugu annertunerusumik atuarsinnaavutit Sermitsiami kingullermik saqqummersumi.