akimasoq
Umiarsuaq Qalasersuarmut takornariartaat
Umiarsuaq takornariartaat Qalasersuarmi angalasussiaq siulleq Norgemi sanaartorneqassaaq. Arktisk Nyt taama allaaserisaqarpoq.
Norgemiut umiarsualiorfiata Vard Søviknesip umiarsuaq takornariartaat Qalasersuarmut angalasussatut suliaq siulleq sanaartussavaa. Arktisk Nyt taama allaaserisaqarpoq.
Franskit umiarsuaatileqatigiiffiata Ponantip umiarsuaq sanaartugassanngortippaa, taanna 2021-imi piareernissaa naatsorsuutigineqarpoq. Ponant umiarsuaatileqatigiiffittut akimasutut nittarsaattarpoq.
“Ponant Icebreaker”, umiarsuaq taama ateqartussaq ilaasunut 270-inut inini 175-ini inissaqassaaq, kiisalu inuttanut 180-inut. Umiarsuaq 150 meterisut takissuseqassaaq qulimiguulinnullu marlunnut inissaqarluni aamma gummibådinut aqqaneq-marlunnik peqassaaq.
Manna tikillugu russit sikusiutaata nukittunersaasup takornarissat Qalasersuarmut angalatittarpai. “Ponant Icebreaker'' umiarsuarni takornariartaatini tamatumunnga atugassiatut sanaartorneqartut siullersarissavaat.
Taanna 2 milliardit koruuninik akeqassaaq.