ilisimatusarneq
Isuani ukiut 3,7 milliardit matuma siorna uumassuseqartoqarneranut uppernarsaatit nutaat
Ukiut 3,7 milliardit matuma siorna uumassuseqartoqarneranik Minik Rosingip Isuani nassaarsiaa uppernarsaatit nutaat taperserpaat. Ingeniørenip nassaarneq Videnskabens Top 5-imut innersuuppaa
Ukiut 3,7 milliardit matuma siorna nunarsuarmi uumassuseqartoqarsimaneranik misissuinerup inerneri Minik Rosingip 1999-imi saqqummiummagit, ilisimatusarnerup silarsuaanni aalassatsitsisoqarpoq. Tamanna ilimagineqartumit ukiunik 200 millioninik siusinneruvoq.
Minik Rosingip inerniliussani Nuup Kangerluani Isuani kulstof-isotopit katitigaanerannik tunngavilersorpaa.
Maanna suleqatinilu Tue Hassenkamilu inernernik nutaanik saqqummiussivoq, Isuani ukiut 3,7 milliardit matuma siorna uumassuseqartoqarneranik tunngaviliisunik. Ingeniøren taama allaaserisaqarpoq.
Ingeniørenip ukioq manna ilisimatuussutsikkut angusat pingaarnersaattut nalilerpai, Videnskabens Top 5-imullu innersuullugit.
Minik Rosingip qaarsuni ujaqqami erlinnartumik aligornik mikisunik nassaarpoq, taakku Tue Hassenkamip Nano-Science Centerimilu ilisimatusartut allat kingorna periutsit nutaat atorlugit misissoqqissaarsimavaat.
Kulstoffiinnaanngitsumik uumassusilinnik allanik ujaasisimapput.
- Nitrogen, oxygen aamma fosfor suli kulstoffimut atasoq takusinnaavarput, taakkorpiaallu tassa molekylet uumassusilinnut attuumassuteqarnerannut naatsorsuutigineqarsinnaasut, ukiut millionilikkaat matuma siorna granatit iluinut naqinneqarsimasut, Tue Hassenkam Ingeniørenimut oqarpoq.