Siumut nakorsanik tikisitserusuttoq

Nunarput siunissami nakorsassaaleqinerulertussaavoq. Taama naliliivoq Jens-Erik Kirkegaard (S).

Nakorsammi amerlanersaat Danmarkiminngaanneersuupput, tassanilu nakorsassaaleqineq aamma annertusiartorpoq.

Taamaammat ajortorsiut annertusiartuinnannginnissaa pinaveersaartinniarlugu ullumi Inatsisartuni oqallisissiaraa.

Jens-Erik Kirkegaardip (S) siunnersuutigaa, nakorsat tikisinneqartartut naalagaaffiup avataaniit ujartorneqartalissasut.

- Piffissanngunnginnerpa nunarsuaq tamakkerlugu nakorsassarsiortalernissaq? Nakorsat tuluttut oqalussinnaasut, naatsorsorneqarsinnaavoq amerlanerungaartut pissarsiarineqarsinnaasut, taanna oqallisissiatut siunnersuuteqarluni tunngavilersuivoq.

Inatsit allanngortinneqassava?

Nakorsanik tikisitsisalernissamut qanoq pilerinarsaasoqarsinnaanera Naalakkersuisunit misissoqqullugu kaammattuuteqarpoq.

- Tamanna ajornarunnaartinneqassappat inatsisitigut sinaakkutit suut nutartigassaappat? Napparsimaveqarfinni tuluttuumiit nutserisinnaasut naammappat?, Jens-Erik Kirkegaard (S) nangilluni allappoq.

Journalillu, nakorsiat allattorsimaffii qallunaatut allanneqartartut eqqaamaqqullugit aamma tikkuaavoq.

Danmarkip suleqatiginera

Jens-Erik Kirkegaardip (S) tikkuarpaa, Danmarkimi illoqarfissuarnut alimasissunut nunat allaniit, soorlu Ungarnimiit, Litauenimiit, Italiamiit allaniillu Danmarkimi nakorsat atorfinitsinneqarnerini ukiup affaani sukumiisumik qallunaatut oqalunnissamik atuartinneqartarnerat. Taamatulli aaqqiissuteqarneq issuarneqarsinnaasoq, Siumumi politikeri isumaqarpoq.

- Aaqqiissutissat ilaattut isigisariaqarparput Danmarkimi illoqarfiit avinngarusimasut nunanit allaniit sukumiisumik qallunaatut ilinniartitsigaangamik Kalaallit Nunaannut nakorsanngortussanik peqataatitsisarnissaq, taama allappoq.