Gå til hovedindhold

Iddimanngiiu Bianco: Suliffik pileringuaannarsimavara

Destination East Greenlandimi pisortaaninngortussap najukkami ingerlatallit suleqatigalugit takornarialerinerup ineriartortinnissaa qilanaaraa

Iddimanngiiu Bianco decembarip ulluisa aallaqqaataanni takoriaqartitsivimmi Destination East Greenlandimi pisortaanertut sulileruni suliassaaleqinavianngilaq. Ima ingasatsingaaq, allaat akissuteqannginnermini eqqarsaatingeqqaartariaqarlugu suna anguniakkamini pingaarnerpaatinnerlugu.

- Pingaanertut najukkami ingerlatallit nunaqarfimmi Tasiilamilu takornarialerinermik ineriartortitserusuttut qanimut suleqatigissavakka, taanna Sermitsiaq.AG-mut oqarpoq.

Nunaqarfiit tamarmik pitsaaqquteqartut

Iddimanngiiu Bianco inuunini tamaat Tasiilami najugaqarsimavoq. Taanna serviceøkonomisut takornarialerineq immikkut sammisaralugu ilinniarsimasuuvoq.

- Ilinniarnera aallartikkakkulli una atorfingerusuttuarsimavara, taanna oqarpoq.

Pingaarnersiuineranut siullernut ilaassaq nunaqarfinnut angalanissaq najukkanilu periarfissaasinnaasut pillugit oqaloqatiginnittassalluni.

- Tamarmik immikkut kusanartumik ilisarnaateqarput suliniuteqarfigisinnaasatsinnik, Iddimanngiiu Bianco oqarpoq.

Taassuma ilaatigut Isortoq eqqaavaa, tassa Kangerlussuarmiit sermersuaq qulaallugu tikiffissaat siulleq imaluuniit Sermilik Kangerluk, tassani Tiniteqilaaq sumiiffimmi pingaartutut inissisimalerluarsinnaavoq.

- Nunaqarfinnut angalanissara qilanaarutigeqaaraa.

Aasaanerani ulikkaaqqasartoq

Unammilligassat ilagaat aasaanerani unnuiffiusinnaasut ulikkaaqqasarneri.

- Ulapaarfiup sivitsorneqarnissaa unnuiffiusinnaasullu amerlanerulernissaat takorloorpara. Tassani soorunami najukkami ingerlataqartut qanimut suleqatigissavakka.

Najukkamilu attaveqaatit kisiisa pingaartinngilai. Taassuma oqaatigaa Nuummi aamma attaveeqaatigissaarluni Visit Greenlandillu suleqatiginissaa qilanaaralugu. Tamatuma saniatigut attaveqaatit avataaneersut pingaaruteqassusaat tikkuarpaa tassanilu pingaartumik nuna ataaseq takornarialerinermut pingaaruteqarluinnartutut inissisimavoq.

- Islandimi attaveqaatigissangaarpunga suleqatigiinnittalu pitsanngorsarnissaa qilanaarutigaara.

Air Iceland aasaanerani ullut tamarluinnaasa Kulusumut timmisartuussinermik ingerlataqartarpoq, martsillu apriilillu qaammataani sapaatip-akunneranut tallimariartarluni.

Tassa pisortaaninngortussaq suliassaaleqisussaanngilaq.

- Aallartinnissara qilanaareqaara, Iddimanngiiu Bianco oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER