Arctic Winter Games
AWG kulturikkut takutitsinissaanut inuusuttut arfinillit toqqarneqartut
NAPA, nunatsinniik AWG-imut kulturimut atatillugu takutitsinernut arfineq-aappassaanik isumaginnissaaq.
AWG tulleq Canadap avannaani North West Territoriesimi (NWT) 2018-imi pissaaq. Ileqqut malillugit nunatsinniik kulturikkut takusassiaqassaaq.
Sineriammiit misilitsittorpassuit
Qinnuteqartitsisoqarmat inuusuttut 36-t qinnuteqarput taakkunannga nunaqarfinneersut 16-iullutik.
AneMarie Ottosen ilinniartitsisutut isiginnaartitsisartutullu ilinniagaqarpoq, inuusuttullu suleqatiginissaat qilanaaraa.
- Misilitsittut tamaasa qujaffigerusuppakka aammalu siunissami tunniutiinnaratik sapiissusertik atorlugu isiginnaartitsinerup nipilersornerullu silarsuaani misilittaagisi, tamassimi pinngorartitsinermi atorfissaqartinneqarpusi. Qujanaq, AneMarie Ottosen tusagassiuutinut nalunaarummi oqarpoq.
Skype aamma Facetime atorlugit misilitsinnerit
Sinerissamiit qinnuteqartut skype/facetime-ilu atorlugu misilitsipput, Nuummi najugallit NAPAp Katuami allaffinukarlutik misilitsittut.
- Inuusuttut pikkoreqaat, toqqaaniarnerlu ajornakusoorsimaqaaq. Toqqarneqartut piginnaaneqarluartut toqqarakkit tulluusimaarutigeqaara. Suleqatiginissaanut qilanaalereerpunga. Isiginnaagassiassap nuannerunarluinnartup oqariartuutissaa piareersaleruttorpara, nipilersuutitaqassaaq, qitinnertaqarluni isiginnaartitsinertaqarlunilu. Inuusuttut toqqarneqartut 14-it
18-illu akornanni ukioqarput.
Pisortaaneq iluarisimaartupilussuaq
NAPA-mi pisortaaneq, Mats Bjerde iluarisimaarpoq:
- AWGip kulturimut atatillugu isiginnaagassiarititassaanik NAPAp isumaginnittarnera nuannareqaara. Aamma inuusuttut toqqarneqartut Nuumminngaanneersuinnaannginnerat alutoraara, sinerissaminngaanniimmi ilaasussat peqataasussat affaraat. Aamma niviarsiaqqat nukappiaqqallu amerlaqatigiinnerat takullugu nuannerpoq, pisortaaneq oqarpoq.
AWG 2018-imi peqataasussat tassaapput:
- Esaias Berthelsen, Sisimiut - 16-nik ukiulik
- Nikoline Nielsen Sigurdsen, Ikerasak (Uummannaq) - 17-nik ukiulik
- Hans Paulus Jensen, Kullorsuaq (Upernavik) - 17-nik ukiulik
- Nina Bech Markussen, Nuuk – 15-nik ukiulik
- Navarana Didriksen, Nuuk – 14-nik ukiulik
- Nick Poulsen, Nuussuaq (Nuuk) – 18-nik ukiulik
Arctic Winter Games North West Territoriesimi 2018-imi marsip 18-ianiit 23-anut pissaaq. NWT-mut aallartinnatik Nuummi sungiusartinneqassapput.