Peqatigiiffik Kalaallit Meerartaat: Efterskolerlutik angerlarsertut ima ikiussavagut

Kalaallit inuusuttut Danmarkimut efterskoleriartillutit, angerlarsimaffimminniit ungasissorujussuarmi najugaqartarput.

Sapaatit akunnerisalu naaneranni atuartut danskit angajoqqaaminnut angerlartarput, kalaallillu efterskolertut angajoqqaamukarnissaminnik periarfissaqartaratik.

- Taamaasillutik kalaallit atuartut, atuarferujussuarmi kisimiilersarput - taamatulli pisoqartillugu angerlarserneq sakkortusissinnaavaa naggataanilu angerlaannaarnermik kinguneqartarluni, Peqatigiiffik Kalaallit Meerartaat tusagassiuutinut nalunaarummi allappoq.

Atuaruk: Danmarkimi efterskolertorpassuit taamaatitsisariaqartut

Peqataasut arlaqartut

Taamaammat suliniaqatigiiffiup suliniut 'Allu' pilersippaa, tassuuna kalaallit Danmarkimi efterskolertut ataatsimoortillugit sapaatit akunneri naanersiortinneqartalissapput, tamatumalu malitsigissavaa angerlarsernerup annikillisinneqarnera sapiissuseqaleqqinnerlu.

- 2015'imi atuartunut 20-innarnut 'Allu' misilittakkanik katersiniarlutta pilersipparput. Ingerlaannarlutalu paasivarput atuartut tamanna pisariaqartissimagaat. Taamaammat ukiup tulliani, ukioq atuarfiusoq 2016-17-imi, 60-nik peqataatitsinissamut pilersaarutaasimangaluartoq, 90-inngortippagut, Peqatigiiffik Kalaallit Meerartaat allaffeqarfiani aqutsisoq Nike Berthelsen tusagassiuutinut nalunaarummi oqarpoq.

Atuaruk: Kalaallit efterskolimi atuartut amerlasuut taamaatiinnartarput

Taamaatiinnartartut ikiliartortut

'Allu'-mik sapaatit akunneri naanersiornermi orpippassuarnut aammalu Small Time Giants-ikkunnut tusarnaariarneq ilaatigut misigineqarsinnaasimapput, tassa efterskolertut sapaatit akunnerisa naanerani misigisassarsiortinneqarsinnaapput.

- 'Allu' pilersikkatsigit, kalaallit Danmarkimi efterskolertartut 20 procentit missaanni angerlaannartarsimapput – 'Allu' gruppitsinnilu peqataasut 10 procentiisa missaat angerlaannartarlutik. Taamaammat kisitsisit pisortatigoortut naapertorlugit massakkut 16,6 procentiuppata isumaqarpugut suliniut 'Allu' pissutaaqataasoq, suliniaqatigiiffiup allatttaanera Puk Draiby oqarpoq.

Angerlaannartartut ikileriaateqarsimanera suliniaqatigiiffiup nuannaarutigaa.

- Atuartulli taama amerlatigisut angerlaannartartillugit, taava suliap ingerlateqqinnissaanut tunngavissaqarluarpoq. Isumaqarpugut aallannginnermi pitsaanerusumik piareersarnissaq pingaaruteqartoq, aammalu Ilinniatitaanermut Naalakkersuisoq, Doris J. Jesnenip siunnersuuteqarneratut ilisarititsilluni tammaarnertut ittumik pilersitsinissaq pitsaassasoq, isumaqarpugut. Taamaaliornikkut atuartut efterskolernerup aallartinnerani piareersimanerlulissapput, Puk Draiby oqarpoq.