sungiusarneq

Sungiusarneq: Nunat tamalaat akornanneersut annanniummik ujaasisut

Umiarsuit timmisartullu nunani assigiinngitsunit tallimaneersut Danmarkstrædetimi sungiusarnermi peqataassapput

Vædderen sungiusarnermi peqataassaaq

Kalaallit Nunaata Islandillu akornanni imaani nilleqisumi umiarsuaq kivisimavoq. Ilaasulli annanniutit atorlugit annassinnaasimapput.

Umiarsuit nunani assigiinngitsunit tallimaninngaanneersut imartaq tamanna annanniutinik ujaarlerfigissavaat. Taakku qulimiguulinnit illersornissaqarfiullu timmisartuutaanit Challengerimit ikiorneqassapput.

Atortorissaarutit atorneqartut assigiinngitsut annaassiniarnermi ataqatigiissarneqarnissaat, suliakkiissutigineqarsimavoq.

Taamatut pisuusaartitsineq, aqagu marlunngornermi, nunat tamalaat akornanni sungiusarnermi Arctic Guardian-imik taajuuserneqarsimasumi sungiusangassat ilamininnguaraat.

ATUARUK: Ataatsimoorussamik oqaatsit sungiusarnermi ilinniarneqassapput

Umiarsuaq alapernaarsuut Vædderen, Challengeri qulimiguullillu kunngeqarfimmiit peqataassapput.

Taakkua saniatigut umiarsuit timmisartullu USA-miit, Islandimiit Norgemiillu peqataassapput. Annaassianiarnermi qitiusoqarfiit Sverige, Finland Ruslandilu annaassiniarnermut ikiortaallutik ataqatigiissaarisuussapput.

ATUARUK: Russit attaveqatigiinneq atortortussaarutaat Issittumi Sakkutooqarfimmi atorneqartut

- SAR-imik (Search And Rescue) suliaqarnerni suleqatigiissinnaanermut sungisarnissaq tunngaviuvoq, sungiusarnermut pilersaarusioqataasimasoq, Issittumi Sakkortooqarfimmi major Anders Johansen nassuiaavoq.

Aatsaavissuaq Issittumi Siunnersuisoqatigiinni nunat arfineq-pingasut tamarmiullutik sungiusarnermut taama ittumut peqataalerput. Suleqatigiinnermut Arctic Coast Guard Forum, Issittumi Siunnersuisoqatigiit ataanniittoq, aaqqissuisuuvoq.

Sungiusarneq aqagu aallartissaaq.

Sermitsiaq.AG-p sungiusarneq Vædderenimiit malinnaavigissavaa, attaveqarniarnerlu ajunngikkaangat nalunaaruteqartarumaarluni.

Powered by Labrador CMS