eqqartuussisooqataasut
Eqqartuussiviup naalakkiinikkut eqqartuussisooqataasussanik aggersaasinnaavoq
Nunatsinni eqqartuussivinni innuttaasut eqqartuussisooqataarusullutik soqutiginnittunut sisamanngorneq nalunaarfissatut killigitinneqartoq qaangiutissaaq. Eqqartuussisooqataarusuttunik pissarsiorneq iluatsilluarsimavoq, taamaattoq eqqartuussisooqataasartut amigaataanerat suli ajornartorsiutaangallassaaq
Kalaallit Nunaani Eqqartuussiveqarfimmi, projektfuldmægtig Laura Ørakerip, Sermitsiaq.AG-mut paasissutissiaraa eqqartuussisooqataasussanik pissarsiornermi Nuummi 50-it pissarsiarineqarsimasut, tassanilu innuttaasut eqqartuussivimmut ikiuukkusunnerat annertunerpaasoq.
Kujataani saaffiginnittut ikitsuaqqat
- Nunatta sinnerani – illoqarfiit pingaanersaata avataani – neriuutigisimasatsinniit allaanerulluinnarpoq. Ilulissani qulit nalunaarsimapput Sisimiunilu tallimat. Kujataanilu innuttaasut soqutiginnillutik saaffiginnissimasut ajoraluartumik ikitsuararsuupput, Laura Øraker paasissutissiivoq.
Eqqartuussisooqataasussarsiorneq sisamanngorpat unissaaq, tamatuma kingorna soqutiginnillutik saaffiginnissuteqarsimasut pillagaassimannginnersut politeeqarfimmut paasiniarneqassapput.
Eqqartuussisooqataasut 500-t angunissaat siunertaasimangaluarpoq. Tamannalu anguneqarsinnaanngilaq, kisianni Kalaallit Nunaani Eqqartuussiveqarfiup massakkut eqqartuussisooqataasut atorsinnaavai.
- Eqqartuussisooqataasut inuussutissarsiutigilissanngikkaat kissaatigaarput. Tamanna eqqartuussisooqataanermi siunertaanngilaq. Eqqartuussisooqataasartussatut amerlassutsit pisariqartinneqartut tunngavingalugit eqqarsaatersuuteqartariaqalerpugut, Kalaallit Nunaani Eqqartuussiveqarfimmi, eqqartuussisoq Kirsten Thomassen paasissutissiivoq.
Naalakkiineq
- Pisariaqalersinnaavoq eqqartuussisooqataasussanik naalakkiinikkut aggersaanissarput. Tamanna innuttaasutut pissussaaffiuvoq, taamaamma periarfissaq tamanna atorsinnaavarput. Kisianni innuttaasut assigiinngisitaartut eqqartuussisooqataasunissaat qulaakkiingassaraarput, eqqartuussisoq suli aalajangiisoqarsimanngitsoq oqaatigalugu naqissusiivoq.
- Eqqartuussisooqataasussarsiorneq iluatsilluarsimammat assut nuannaarutigaara. Eqqartuussisooqataasussarpassuarnik pissarsiffigaarput, Kirsten Thomassen oqarpoq.
Eqqartuussisooqataasut akissarsiaat
Eqqartuussisooqataasoq akunnerit sisamat ataallugit peqataasoq 700 koruuninik akissarsitinneqartarpoq. Akunnerillu sisamat sinnersimagaanni 1100 koruuninik akissartinneqartarluni. Eqqartuussivimmulli allamut angalaneq pisariaqalissappat, angalanerit akilerneqartarput.