Randi: Michaeli gruppimi peqataajunnaarsimavoq

Inatsisartut gruppianni suleqatigiinniarnermik ajornartorsiuteqarneq pissutaalluni Michael Rosing oqaaseqarsinnaatitaajunnaarlunilu ataatsimiititaliani ilaasortaaffini annaavai. Tamanna Inatsisartuni Demokraatit iluminni suleqatigiissinnaannginnerat pissutaavoq.

- Gruppitta iluani Michael Rosingi suleqatingiuminaannerujussua misigisarsimavarput. Michael Rosingi gruppimi peqataajunnaavissimavoq, partiip siulittaasua, Randi Vestergaard Evaldsen Sermitsiaq.AG-mut oqarpoq.

Suleqatigiikkuminaanneq piffissami sivisuumi pisimasinnaavoq aaqqiissutaasinnaasumillu naapiffissaqarsimanatik. Ajornartorsiutilli aallaavia Randi Vestergaard Evaldsenip oqaatigerusunngilaa.

Atuaruk: Demokraatit iluanni avissaartuunneq

Pisoq gruppimi siulersuisuunernilu eqqartorneqarsimavoq, Michael Rosingillu sinniisuunini patsisigalugu akisussaaffini annaavai.

Partiip qanoq ingerlariaqqinnissaa, Randi Vestergaard Evaldsen aamma oqaaseqarfigerusunngilaa.

- Sulinerput ingerlapparput.

- Sulineq sumut sammiva?

- Massakkut oqaaseqarfigisinnaanngilara, partiip siulittaasua Randi Vestergaard Evaldesn oqarpoq.

Michael Rosing pisumut aamma oqaaseqarumanngilaq, partiillu siulittaasuanut innersuuteqarluni.