Inatsisartut upernaaru ataatsimiinnerminni oqaluuserisassaat

Inatsisartut upernaakku ataatsimiinnissaanni oqaluuserisassat Siulittaasoqarfimmit aalajangersakkat tallimanngornermi nassiuppaat.

Inatsisartut upernaakkut ataatsimiinnerat sisamanngornermi ulloq 20. april aallartissaaq ullorlu 7. juni 2017 naammassinissaa pilersaarutaalluni.

Inatsisartunut ilaasortanit immikkoortut katillugit 41-t, Nunat Avannarliit Killiit Siunnersuisoqatigiiffiannit kaammattuutitut aalajangersakkat marluk, siulittaasoqarfimmit immikkoortoq ataaseq Naalakkersuisunillu immikkoortut 30-it oqaluuserisassanut ilanngunneqarput, Inatsisartut siulittaasuat, Lars-Emil Johansen (S) paasissutissiivoq.

Sapaatit akunnerini ullut ataatsimiiffiusartussat:

Ataasinngornerni, marlunngornerni pingasunngornernilu Inatsisartut nal. 11.00-imiit 15.00-imut ataatsimiittassapput

Sisamanngornerit tamaasa Inatsisartut nal. 11.00-imiit 16.00-imut ataatsimiittassapput

Tallimanngornerit Inatsisartuni ataatsimiiffiusassanngillat, ullut 21. aamma 28. april Inatsisartuni nal. 11.00 – 15.00 ataatsimiiffiusussat eqqaassanngikkaanni

Taakku saniatigut pingasunngornerit tamaasa nal. 11.00-imiit 12.00-imut sapaatip akunnikkaartumik akunneq apeqquteqarfiusinnaasoq ingerlanneqartassaaq, tamatumalu kingorna ataatsimiinneq nal. 15.00 tungaanut ingerlaqqittassalluni. Akunneq apeqquteqarfiusinnaasoq siulleq ulloq 26. april ingerlanneqassaaq Naalakkersuisullu apeqquteqarfigineqarsinnaasut tulleriinnerat Inatsisartut nittartagaanni takuneqarsinnaassalluni

Ataasinngorneq 1. maj kiisalu nalliuttut Tussiarfissuaq tallimanngorneq ulloq 12. maj, Qilaliarfik sisamanngorneq ulloq 25. maj piinsillu ulluisa aappaat ataasinngorneq ulloq 5. juni taamatuttaaq Inatsisartuni ataatsimiiffiussanngillat

Inatsisartut upernaaru ataatsimiinnissaannut tunngatillugu paasissutissat tamarmik inatsisartut.gl-imi takuneqarsinnaapput.