imminut toquttarneq

Tasiilarmiut anorersuarmi neriuummik ikitsisut

Tasiilarmiut 200-t sapaatiip akunnerata ataatsip ingerlanerani imminut toqunnerit marluk inuartarinninnerlu ataaseq aqqusaareerlugit nunaqqatigiit suli ataatsimoornertik naak silarlukkarluartoq takutippaat

Toqqorsivimmit. (Ingerlaaqatigiinnermit assinik pissarsiniarsarivugut)

Tasiilami alianartumik aalassaataasumillu pisoqareersorlu ikumatitamik paaralutik ingerlaaqatigiittoqarmat sila pitsaanerpaaffimminiinngilaq.

- Ukiup nillernerpaaffigigunarpaa. Issisiut 15-t 20-illu akornaniippoq anoraarsuartarluni persilertarluni, Anna Kûitse Kúko aaqqissuuseqataasoq oqarpoq.

Taamaatinnarneqarnissaa pilersaarutaasimagaluarpoq

Silarlunnerata nunaqqataasut peqataanissaralui pinngotsoortinneqarnissaat Paulus (Polle) Lindip aamma ernummatigisimavaa.

- Naapiffissatsinnukarlunga eqqarsaatigaa ingerlaaqatigiinnissaq taamaatiinnartariaqalissaneripput, Paulus Lind oqarpoq.

Ingerlaaqatigiinnissamili naapiffissaq qanilliartortillugu taamaatitsiinnarnissamik eqqarsaateqarneq piviusunngortissinnaanngikkitsik paasinarsivoq. Tasiilarmiunit 2.000-usunit 200-t misiginneqataanertik neriuummillu pigisaqarnertik takutikkumallugu takkussimapput.

- Taama amerlatigisut peqataaneri takullugit tuppallernarpoq, Anna Kûitse Kúko oqarpoq.

Aaqqissuussipallapput

Ilinniartitsisoq Anna diskotekimilu aqutsisoq Paulus piaarinaatsoornerinnakkut Pilersuisumi naapissimapput. Imminullu toquttut marluusut inuartarinninnerlu eqqartuleriaramikku arlaannik iliuuseqartoqartariaqartoq isumaqatigiissutigaat.

- Inuuniarnikkut ajornartorsiuterpassuit, imminullu toquttarnerup ajornartorsiutaanera, kinguaassiuutitigullu atornerluisoqartarneranit ajornartorsiutit Tasiilami takornartaanngillat, Paulus Lind oqarpoq.

- Tamannali naammalertoq isumaqatigiissutigaarput. Arlaannik iliuuseqartoqartariaqalerpoq.

Ingerlaaqatigiinnissamik isumassarsiaq facebookikkut siammarterneqarpoq, piffissallu sivikitsup iluani kajumissutsiminnik suleqataajumasut suleqatigeeriaramik ingerlaaqatigiinnissaq aaqqissuussimallugu.

Ingerlaaqatigiinnermilu peqataasorpassuit ersersippaat illoqarfeqatigiit tamanna pisariaqartikkaat.

- Peqataasut oqaloqatigiippianngillat silarloqimmammi, Paulus Lindip unnuup ingerlanera oqaluttuaraa.

Allanit tapersersorneqarneq nuannaarutigaat

Ikumatitalerluni ingerlaaqatigiinnissap aallartinngitsiarnerani Kommuneqarfik sermersuup upalungaarsimasuutitai borgmesteri Asii Chemnitz Narup (IA) isumaginninnermut pisortaq Grethe Nielsen timmisartumik attartukkamut ilaallutik Tasiilamut tikipput. Tapersersuinerlu Tasiilamit pingaartinneqarpoq.

- Avataanit tapersersorneqarneq misigalugu qujanaqaaq. Aliasunnitsinni kisimiigata paasillugu iluaallannarpoq, Anna Kûitse Kúko oqarpoq.

Inuusuttut aalakoorfiunngitsumi ataatsimoorfissaaleqisarnerat takkuttunut oqaaseqarnermini eqqaavaa. Tamanna kommunimut oqariartuutaasoq paatsoorneqarsinnaagunanngilaq.

Suliffissaaleqineq, suliffinnillu praktikkerfissaaruttarneq neriuutaarunnermik kinguneqarneratigut ajornartorsiutit qaffakaalertarneri aamma eqqaavai.

Sammisassaqartitsinissamut pilersaartoqarpoq

Kajumissutsimilli suleqataasut suleqatigiiginnarnissartik pilersaarutigaat. Ikumatitalerluni ingerlaaqatigiinnissamut aaqqissuussineq suleqatigiinnermut aallartisaataannaavoq.

- Aallartereerpugut, qanorli iliortoqaqqikkumaarnera eqqartorneqarumaarpoq, Paulus Lind oqarpoq.

Ingerlaaqatigiinneq nalilersorniarlugu suleqatigiit ualeru naapeqatigiissapput, allanillu aaqqissuussinissaq aamma eqqartorneqassalluni.

- Ajunngitsumik pisoqartikkumallugu aaqqissuussanik allanik suliaqassaagut, Anna Kûitse Kúko oqarpoq.

Tunumi najugaqarnissani nammineq toqqarsimavaa

Ulloq una ippassaq anorlersimaneranik takorlooruminaatsitsisoq sapaatip akunneratalu siuliani aalassannartumik misigisaqarfiusimasumik allaanerusoq oqaatigaa. Seqerngup iliveqarfimmut qinngorsimanera inussullu illoqarfimmut paarsisuusup qaammarsimanera eqqaavaa.

- Illoqarfik kusanartorujussuuvoq, taanna oqarpoq. Nunagisaq, pinngortitaq, aasanerani piniariartarnerit tuperlunilu asimiittarnerit aamma eqqartorpai.

- Maani najugaqassalluta nammineq toqqangaraarput, Anna Kûitse Kúko oqarpoq.

Oqiliallappoq

Paulus Lindimut ulloq aamma alianaalluinnarpoq, silali pissutaanani. Imminut toquttoqarmat, inuartoqareernerullu aqaguani tassunga assut artornarsimavoq. Pisumullu oqaatsinik marlunnik nassuiaataasinnaasunik ujartuilluni.

- Ikumatitalerluni ingerlaaqatigiinnermi tapersersuisorpassuit assut oqiliallaatigaakka, nassuiaavoq.

- Takusinnaavaralu kisima misigissutsit ukua atungarinagit.

Nammineq misiginikuusimavai

Inuuniarnikkut ajornartorsiutit nalaanneqaraangata Paulus Lindip inuttut nammineq aamma tigusarpai.

- Qatanngutikka marluk mikingallaramik kinguaassiuutitigut atornerlunneqarnikuupput, oqaluttuarpoq.

Soraluaa aamma kingusinnerusukkut kanngutsaatsuliorfigineqarnikuusimavoq.

- Imminut toqunnikuuvoq, tunuarsimaarpaluttumik eqqissisimasumilli nassuiaavoq.

Paqumiginninnerup qaangerneqarnissaa taassuma pingaartippaa.

- Ammanerusumik ajornartorsiutinik eqqartuisinnaanngortariaqarpugut, naqissusiivoq.

Tamaalillutillu akissutissamik pinngortitami kusanarluinnartumi ujartuipput - angerlarsimaffitsillu sorsuutiginiarlugu.

Powered by Labrador CMS