innarluutillit
Innarluutilinnut sullissisut Sisimiuniilissasut
Innarluutilinnut tunngassuteqartut nukittorsarneqassapput - IPIS Nuna Tamakkerlugu Innarluutilinnik Sullissivimmut kattunneqassaaq. Taakku Sisimiuniissallutik
Siunnersuisarfik IPIS 1. januar 2017 aallarnerfigalugu Sisimiuniilerpoq. Tassani Nuna Tamakkerlugu Innarluutilinnik Sullissivimmut Sisimiuni pilersinneqalersumut kattunneqassalluni.
- Nuna Tamakkerlugu Innarluutilinnik Sullissivik eqqarsaatigilluagaavoq assersuutissaqqilluinnarlunilu peqatigiilluta akornutaasunik uatsinnik unittooqqajaasitsisunik ajugaaffiginnissinnaanitsinnut. Peqatigiilluta akisussaassuseqassaagut peqatigiillutalu sulissutigissavarput inuit innarluutillit sapinngisamik nalinginnaasumik inuuneqalernissaat qulakkeerniassallugu, naalakkersuisoq Sara Olsvig tusagassiuutinut nalunaarummi oqarpoq.
Atuaruk: Sisimiuni innarluutilinnut tamanut sullissivik
Sullissivik innarluutilinnut tunngassuteqartut ataatsimut isigalugit pitsanngoriaataassaaq. Siunnersuisarneq, ilitsersuisarneq sungiusaasarnerlu ataatsimoortinneqalissapput, tassami IPIS-imi suliarineqartartut siunissamut sullissivimmi suliarineqartalissammata.
Atuaruk: Innarluutilinnut sullissiviup sananeqarnissaa aallartilerpoq
IPIS suli attavigineqarsinnaavoq
IPIS-imiit innarluutilinnik sullissiviup ammarnissaanut ikaarsaariarnermi tassani IPIS-ip siunnersuisarnermik ilitsersuisarnermillu suliarisartagai innuttaasunut innarluutilinnut, ilaqutaasunut taamatullu tamakkuninnga sulialinnut tunngatillugu ingerlaannassapput. Aatsaat innarluutilinnik sullissivik ammarpat IPIS maannakkutut iluseqarnerminit atorunnaarsinneqassasoq Naalakkersuisut paasissutissiipput.
Innarluutilinnik sullissivik naatsorsuutigineqarpoq august - september 2017-imi ammassasoq.