Tunuartitsineq
Kim: - Nuna tamakkerlugu pilersaarusiaq tunuartissallugu isumaqatigeereerpugut
Pilersaarusiap assortuussutaaqisup Naalakkersuisooqatigiit isumaqatigiinnermikkut tunuartippaat
Nuna tamakkerlugu pilersaarusiap Inatsisartunit eqqartorneqarnissaanut timialuit sioqqullugu tunuartiinnarneqarnera Kim Kielsenip (S) suliarilluagaanngitsoq nassuerutigaa.
- Tiimini sinissimanersugut apeqquserneqarsinnaavoq, taamaassimasinnaavormi, Naalakkersuisut siulittaasuat oqarpoq.
Isumaqatigiipput
Taassumalu erseqqissarpaa aningaasaqarnermut naalakkersuisut Randi Vestergaard Evaldsen peqatigalugu aalajangiussimagitsik pilersaarusiaq tunuartiinnarniarlugu.
ATUARUK: Nuna tamakkerlugu pilersaarusiaq taamaatiinnarneqarpoq
Nunaqarfinnik matooraanissaq oqallisaaqaaq
Pilersaarusiami naggasiutigineqartup ilaa politikkikkut aalassatsitsingaatsiarpoq.
- Ineqarfiit ineriartoqqinnissaminnut periarfissaqanngitsut matujartuaarnissaannik pilersaarusiorluakkamik aningaasaliinissamut ataatsimiisitaliaq suleqatigiissitaliarluunniit pisinnaasariaqarput, nuna tamakkerlugu pilersaarusiami ilaatigut taama allassimavoq.
ATUARUK: IA-p nunaqarfiit attatiinnarusuppai
Paasilluarneqartariaqarpoq
Pilersaarusiaq ineqarfinnik matooraanissamik taakkartuinngilaq. Tamannali pingaarnersiuinerup kingunerisinnaagaa allaaserineqarluni.
- Politikkerinit qanoq paasineqarnersoq apeqqutaalluinnarpoq, Kim Kielsen (S) oqarpoq.
Ineqarfinnillu matoorisoqassasoq Inuit Ataqatigiit siulittaasuata Sara Olsvig eqqartorneqarnerarpaa.
- Uuma oqallisigineqarluarnissaa pingaaruteqartorujussuuvoq suliniutissatut inerniliutigiinnarnagu. Taamaattumik aappaagumut utaqqisinnissaa pitsaaneruvoq, Kim Kielsen oqarpoq.
ATUARUK: Inassuteqaat: Najugaqarfiit assigiissumik pineqassanngillat
Suleqatigiissitaliornissaq ajornartorsiutaavoq
Najugaqarfiit suut pingaarnerutinneqassanersut tunulliunneqassanersulluunniit suleqatigiissitaliortoqarnissaanut nuna tamakkerlugu pilersaarusiami innersuussutigineqarnera Kim Kielsenip (S) pissusissamisoorsorinngilaa.
Pilersaarusiaq taamaattoq Inatsisartunit taasissutigineqassannginnerarpaa tusaatissatulli tiguneqartussaanerarlugu.
- Suleqatigiiliortoqassanersoq aaliangiussassaavoq annertooq. Immikkulli siunnersuutigineqartariaqarluni, Kim Kielsen (S) isumaqarpoq.