Gå til hovedindhold
Grønlandsk

Atuakkiortoq atuakkanillu saqqummersitsisarfiutilik Magnus Larsen atuakkanik pingasunik ippassaq 23. juni, Katuami saqqummersitsimmat inuppassuarmik peqataaffigineqarpoq.

Naak 85-inik ukioqangajaleraluarluni, Magnus Larsen suli ingerlarsortuarpoq ippassaq atuakkat 'pingajoraartariartarigamigit', ataatsikkut pingasut saqqummersillugit.

Nammineq atuakkiani 'Illinersiorluni ingerlavik' (eqqaamasalersaarutit), saqqummersippaa. Atuakkiorfiatalu 'Maanuup atuakkiorfia'-ta saqqummersippai atuakkat pissanganartut allat marluk: 'Reat66 - aaqqissuusseqqinnerup nutaap qitornai' (Nathan Biilmann, Marianne Jensen & Lars-Emil Johansen), aamma Hivshu’p (Robert Perry II) atuakkiaata qallunaatuunngortinnera 'Vores forfædre med Shamaner'.

Atuakkanik saqqummersitsineq Katuami ingerlanneqartoq nuannersumik pivoq, oqalugiartoqartarluni, erinarsortunik qilaasersortunillu aliikkusersuisoqartarluni erinarsoqatigiittoqarluni, atuakkiortunillu atsioqattaartitsisoqarluni, minnerunngitsumillu peqataasut akornanni makitsinikkut atuagannatsitsisoqarluni nuannarineqaqisumik.

Kalaallit Atuakkiortut, KA, aamma EPI sinnerlugit angut nuannaartorinartoq Magnus Larsen pilluaqqungaarpara.

Juaaka Lyberth

(KA-mi EPI-milu siulittaasoq)