Gå til hovedindhold
Grønlandsk

2010
Nunatta aningaasanik amigaateqannera politikkerinit tamanit ilisimaneqalereeraluarpoq taamani naalakkersuisooqatigiit, IA, Demokratit aamma Kattusseqatigiit, Kubik Kleist siuttoralugu nalunaarusiaq 2011-mi saqqummersimmassut 'uninngaannarneq periarfissaanngilaq', Atugarissaarnissamut ataatsimiititaliarsuup suliaa.

Taamani sumut ingerlasoqarnissaanik erseqqissumik takorluuisoqarpoq – issittumi inuiaqatigiit atugarissaartut, aaqqissuusseqqinnertigut nunatsinni atugarissaarnissaq qulakkeerneqassalluni, pitsaasunik atuarfeqartoq, peqqinnissaqarluni ingerlalluartumik, isumaginninnikkullu pitsaasunik atugassaqarfiusoq.

2013-14
Kleistilli naalakkersuisuutitai nutarteriniarnerminni arriippallaarput, aalajangiinissanut nangaasarlutik, politikkikkullu sulinerat ilisimatoorpalaarpallaarluni.

2013 pissaaneq Siumumut annaavaat, taakku naalakkersuisoqatigiiliorput Partii Inuit aamma Atassut peqatigalugit. 2014-imi qinerseqqittoqarmat Kim Kielsen siuttoralugu, Demokratit aamma Atassut peqatigalugit Siumut naalakkersuisunngortitseqqippoq. Kielsenip naalakkersuisuutitaasa ilisarnaatigaat pissutsit allanngortaaliornissaat anguniagaringamikku, aaqqissuusseqqinnerillu ilaat (kommunit) utertinniarlugit.

2016 - assiliaq killormut saappoq
2010-mut naleqqiullugu ukioq manna assiliaq killormut sammivoq. Meeqqat atuarfiannut isumalluarsimanerungaluaq atuarfiillu tusaamaneqarnera aserorluinnarsimapput, ilinniartitsisut inspektørillu appisaluunneqartualersimallutik, minnerunngitsumik naalakkersuisuminnit.

Nunatta aningaasaqarnerata ajalusuulerneranut annaassiniaatuaarpasippoq siusinaarlutik soraarnerussutisiallit ilaat, soraarnerussutisiaqarunnaarlutik suliffissanut suli pilersinneqanngitsunut suliartorsinnaalernissaat. Taakkuli ilaat 70-it pisartagaqqileriaannaapput, naalakkersuisup akisussaasup piareersarluarnani suliaq ingerlassimammagu.

Suliffissaaleqisut ikiliartorusaarput, aasalli tamaasa taamaattarput sanaartugassat ingerlanneqaleraangata. Suliffissalli pilerinartut akissarsiorluarfiusinnaasut suli pilersinneqanngillat. Akerlianillumi rubinisiorfissap sulisuni soraarsillugit angerlartippai, nunani allamiut aatsitassarsiorfimmut aningaasaliiumanngimmata.

Taamanna Naalakkersuisunit tatiginninnginnermik aningaasaliisartuniit ersarissumik kalerrisaarutaavoq.

Inuussutissarsiutit ajornartorsiorput
Savaateqarnermik aamma piniarnermik inuussutissarsiornerit annertuunik ajornartorsiuteqarput aamma aalisakkanik suliffissuaqarnerup ilaa.

Savaatillik aningaasaqarnerliorput, toqoraavillu Neqi nioqqutissiassaminik savaarassaaleqivoq, savaatillit naammattunik tunisassiunngimmata. Qaqortumi ammerivik, ukiut arlaqanngitsut matuma siornatigut amerpassuaatilik tunisinnaanngisaminik, amissaaleqivoq, piniartut amernik naammattunik tunisassiunngimmata. Avannaani aalisartut aalisagartatik imaanut eqqaannarpaat suliffissuarnut tunisisinnaannginnamik, suliffissuillu sulisussaaleqiuarsinnarput – ajornartorsiut ukiorpassuarni ilisimaneqartuarsimasoq, aaqqissutissaqarfigineqanngitsorli.

Taakku qaavinut ilanngutissapput Pituffimmi sakkutooqarfimmi sullissinermit akileraarutinit ukiumut isertitaasartut 100 mio. kr. annaaneqalersut. Naatsumik oqaatigalugu – atugarissaarnissatsinnut aningaasalersuisussat inuussutissarsiutit annertuumik ajornartorsiorput.

Naalakkersuisunili partiit suliffeqarfinnik namminersortunik illersuisartutut imminnut taasartut – liberaalit – Atassut aamma Demokratit ajornartorsiutit qanoq aaqqinneqarnissaannut nipangersimajuarsinnarput.

Allanngutsaaliuineq periarfissaanngilaq
Tamakku tunngavigalugit tupinnanngilaq Aningaasarsiornermut Siunnersuisoqatigiit siulittaasuata politikkerit eqeersaqqimmagit nunatta aningaasaqarniarnera ajalusoorluinnassanngippat aaqqissuuteqarniarluni suliniutissat aallartittariaqalersut, suliffissallu nutaat pilersittariaqalersut.

Apeqqutaavorli maanna naalakkersuisooqatigiit Kielsen-imit siulersorneqartut, politikkikkullu misilittagakitsumit Randi Vestergaardimit (Demokrat) aningaasaqarnermut aatsitassanullu naalakkersuisuufigineqartut, suliassamik taassuminnga kivitsisinnaanersut. Partii Siumut qangamut naleqqiullugu allaanerulersimaqaaq, aaqqissuusseqqinnertigut nutaaliorniartuujunnaarluni pissutsinik allanngutsaaliuinerulersimagami.

Demokratit aquttui politikkikkut misilittagakitsuupput, isornartusiuisarnertillu naalakkersuisut issiaviisa ataannut toqqorsimarpasillugit. Atassut tassaanerulersimavoq partii Siumup aqutaa – partii Siumumut naalattussiaannaq, namminerisaminik kinaassuseqanngitsoq.

Taamaattumik aasaanerani eqiiallannassangaluarpoq inuussutissarsiutit aaqqissuussiffigineqaqqinnissaannut Demokratit aamma Atassut isummaminnik ersarissunik anitsisuungaluarpata, Siumup isumatoqaanit taakkuujuartunit allaanerusunik  aaqqissuusseqqinnissanut periarfissanik tikkuussillutik.