Gå til hovedindhold
Grønlandsk

Nipilersoqatigiinnit nuannarineqaqisunit Chilly Friday-nit, 00-kunni pissatseruttornerminni nunani avannarlerni nipilersortartunut nersornaasiuttakkamut innersuussaasunit avinnermi kingorna, erinarsuusiortartut erinarsortartorlu Malik Kleist kisimiilluni saqqummersitseqqippoq, ateqartumik ”ulloq nutaaq takkuppoq”, nammineq saqqummersitsisarfini Tumit aqqutigalugit.

Anorersuarsuarmi nukittut matussatut ipput
Rockimik nipilersukkanik oqimaannerusunik nuannarisaqartariaqarpoq ”ulloq nutaaq takkuppoq” nuannarissagaanni. Nipilersoriaaseq assersuunneqarsinnaavoq nukipparujussuarnut matunneqarsimallutik anerusututtunut. Nipilersuutilli atorneqarneri ataqatigiilluaqaat, nipilersorluagaallutik, nipilersukkat ingerlanerini sekundini tamani, erinarsukkat akornanni.

Nukissuit aniffigisinnaasatuaraat erinarsortup iggiaani sullunnguaq, tassuunaqqullutillu tusarnaartup uummataanut qarasaanullu ingerlaqqillutik. Malik erinarsullaqqissorsuuvoq erinnani assigiinngitsunik nippatsittaqattaarlugu pinnguarisinnaallugu. Qarasaq atorlugu erinnarsuutit taallai paasiniagassaapput, uummatikkullu erinnanut maniguutiinnalertariaqarluni.

Taallai paasinngikkaluaraanniluunniit, erinniat anorersuarujussuartut ipput, anoraasuarsuup isaanut saanngikkaanni tigitaarujussuarneqarsinnaalluni.

Taamatut naatsukullammik pikkunartumilli Malik Kleist aamma Qillannguaq Berthelsenip erinniaat cd-miittut Maliullu taalliai oqaatigerusuppakka. Erinarsortuuvoq soorunami Malik, aammali Nive Petersen, Kuno Hammond, Peter Lyberth erinarsoqatigiillu erinarsuutit ilaanni peqataapput. Tiguartinniaraannili heavy-mik nipilersukkanik nuannarisaqartuusariaqarpoq, taamaanngippat nipilersukkat tusarusunneqassanngimmata.

Aarlerinartoqanngilarli, Malik Kleistip nipilersugassiai nuannerinnitserpassuaqarput, nunatsinni nipilersortarfinni aamma ”space world”-imi (internet atorlugu nipilersugassianik malinnaavinni) tusaamasarsuuvoq.

Kiffaanngissuseqarusunnermiit Zombiet nunaannut
Taallat paasiniarsarigaanni imminnut ataqatigiissorinarput. Erinnarsuutit siulliit marluk kiffaanngissuseqarusunnermik namminerisamillu kinaassuseqarusunnermik imaqarput. ”Illit kisivit” inummik pinnarinerpaamik aapparilerusutamillu naapitsinermik imaqarpoq, ”eqqumiik”-llu imaraa namminerisamik kinaassuseqarusunneq.

Tassagaanniit ulloq nutaaq aallartipporlusooq – soorlulittaaq inuuneq nutaamik aallarterusunneqartartoq allanik peqateqarluni. Asanninnerup inerititaa erinarsuutigineqarpoq ”Kuluk”-mi, meerannguup silarsuarmut appakaanneratigut. Ilisimanngikkaanni panimmut taalliaasoq, taallaq aamma paasineqarsinnaavoq inuunitoqqaq qimallugu nutaamik aallarteqqinnertut.

Nutaamik aallartinnerit avissaarneq ajalusoornerlu peqqutigisaannarpaat, soorlu ”Silarsuara sequmillugu”-mi eqqartorneqartoq. Taassuma kingorna avissaarneq alliartuinnarpoq, qooroq silissigaluttuinnartutut illuni, naggataatigut illorpassuaqarfimmi nammineq kajumissuseeruttutut zombietut inuuneqalernermik malitseqartumik. Uanga paasinninnittut taallat paasineqassanersut naalaartussat taalliortullu aalajangerumaarpaat,

Nipilersoriaatsimi suliaq pitsak
Ataatsimut isigalugu nipilersoriaatsimini “ulloq nutaaq takkuppoq” suliaavoq pitsak, nipilersoriallaqqissuarnik arlalinnik peqataaffigineqarsimasoq, soorlu Angunnguaq Larsen (guitars), Jens Nielsen (tumerparpaat), Qilannguaq Berthelsen ( bas aamma immiussisitsisoq). Mexikormiu Artoru Gomes Platincia nipigissaasuusimavoq.

Saqqaa alutornartoq eqqumiitsuliortumit Maja Kehlet Hansenimit suliaavoq. Saqqummersitaq ataatsimik ippinnartoqarpoq, tassalu saqqaani iluanilu allattukkat atuaruminaappallaaqimmata, qalipaatit akuleriissaarneri peqqutigalugit. Sermitsianit arfinilinnit tallimat ”ulloq nutaaq takkuppumut” tunniunneqassapput.