Ataatsimoorluni kivitsineq

Qaqortumi piumassuseqarluarput

Kalaallit Nunaanni Timersoqatigiit Kattuffiat, Arctic Winter Games aamma Bedre Børneliv, MIBB peqatigiiffinni piumassutsimik sulinerup naleqassusia sammitinniarlugu pikkorissartitsipput

Qaqortumi peqataasut piumassuseqarluarput

GIF, AWG2016 MIBB-ilu nammineq piumassutsimik sulisarneq pillugu Qaqortumi pikkorissaanerit aallartippaat. Taamaasilluni nunatsinni nammineq piumassutsimik sulinerup nukittorsarnissaa pillugu suleqatigiinneq aallartilluaavippoq.
Nunatsinni illoqarfinni assigiinngitsuni pikkorissaanissat siunertaraat, nunatsinni nammineq piumassutsimik sulinerup nukittorsarnissaa, peqatigiiffilerinermi piumassutsimillu sulinermi sakkuusinnaasut aammattaaq taama sulinerup inuiaqatigiinnut naleqassusaa pillugit.
Pikkorissaaneq Qaqortumi ornigarneqaqaat ilaatigut Qaqortumi Sanningasoq Aapalaartoq, Arsaanermut Atuarfik, QaaSusa(i), Kommuuni timersoqatigiillu sinniisuminnik peqataatitsillutik. Taassuma saniatigut peqatigiiffinnit assigiinngitsunit inuit nutaat misilittagallillu peqataallutik, tamanna pitsaasutut misigineqarpoq. Piumassuseq annertoqaaq aaqqissuusaaneq, piumasseq ataavartumillu ingerlasoqarnissaa pillugit eqimattakkaarluni sulinermi.
– Pikkorissaqataanera pissarsiaqarfigeqaara. Sakkussanik nutaanik periutsinillu nammineq piumassutsimik sulinissannut atorsinnaasannik pissarsivunga. Neriuppunga kingusinnerusukkut assingusunik pikkorissaasoqaqqissasoq. Nammineq sulinissamut sapiinnerulersinneqartutut misiginarpoq taama piginnaasanik tunineqarneq” taama oqarpoq Angerdla Kielsen Olsen, pikkorissaqataasoq.
– Nuannaaqaagut taama peqataasoqartigimmat, Qaqortumi taama pitsaatigisumik suliniuteqaqataasoqartigimmat. Eqqartuivugut suliaralugillu iluatsittut kiisalu qanoq iliorluni piumassutsimik sulineq suli nukittorsaqqineqarsinnaanersoq pillugu. Nammineq piumassutsimik sulineq ataqatigiilersitsisarpoq, angusaqartitsilluni nuannaarnermillu pilersitsilluni inuiaqatigiinni, pimoorutivillugu nammineq piumassutsimik sulineq qanoq iliorlugu nukittorsarneqassanersoq aallunneqarluni” GIF, AWG2016 MIBB-ilu ataatsimoorlutik nalunaarput.

Powered by Labrador CMS