Fredag, marts 21, 2014 - 14:38

Assit: Ajugaasut tallimat

'Isi øje eye'-mi unammisitsinermi ajugaasut Sisimiuni Taseralimmi sisamanngornermi saqqummiunneqarput

Assinik unammisitsinermi ajugaasunik toqqaaneq 'Isi øje eye'-mik taaguuserneqarsimasumi Sisimiut kulturikkut illuanni Taseralimmi sisamanngornermi ingerlanneqarpoq. Inuit 100-t missaanniittut peqataapput. 

Ajugaasut tamarmik iPhone-mik tunineqarput. 

Assinik ajugaasunik toqqaasussatut aalajangiisuupput Arnajaraq Støvlbæk, Aka Hansen kiisalu Ivars Silis. 

- Assit toqqarneqartut tamarmik immikkuullarissuseqarput. Assi ataasiinnaatillugu tamaasa inissinneqarsinnaapput, taamaakkaluartorli oqaluttuarpassuarnik pilersitsisinnaallutik. Kalaallisut oqaluttuariaasiunngikkaluarpoq, arlaatigulli nunatsinnut assit tamarmik tunngatinneqarlutik, naliliisartut nassuiaapput. 

Assini normu 36 - ataani assip tullia - minillugu assiliisut inuusuttuupput.

Assit, assiliisut, ajugaasullu naliliisartunit naliliineqarnerat ataani takuneqarsinnaapput

'Sammisaq: Nammineq: Kinaanerit takuneqarsinnaavoq, timit namminiissutsillu ersaripput. Ajugaasoq: Eli Olsen 'Taartup teqeqqua'. Assini sammineqartuni assi una kisiartaalluni ilaatinneqarpoq. Assi oqariartuuterpassuaqarpoq nukittorpasilluni assilisap qalipaatai akerleriinneri pissutaallutik. Imminut assilineruvoq ilumoorpasissuulluni kiinaq siunersissaanngitsuuvoq assimullu isiginnaartumut sunniuteqarluni'
Foto: Eli Olsen
'Sammisaq: Ileqqut ilisimasagut. Assiliisoq: Agathe Storch. Assilissami oqaluttuarpassuaqarpoq itisuujulluni, ersinngitsunillu paasissutissarpassuaqarluni. Arnap assaa inuunermik misilittagartuujuvoq. Tamatta taamaattumik kaffisoriarnikuuvugut. Kalaallit kaagiat, tiilu ilisarnartuupput. Assi ilumoorsaartuuvoq.'
Foto: Agathe Storch
'Sammisaq: Nunarsuaq. Ajugaasoq assiliisorlu: Milo Rosing. Illit nunarsuat assimi takutippat qanorlu misiginerit takuneqarsinnaavoq. Assi: 'Sialuk'. Assimik isiginnaartup misigissusai qaffakaapput, tassani takuneqarsinnaasut naamaneqarsinnaasullu takorlooruminarput silalualaartorlu tusaaneqarsinnaalluni. Assi assut nipaappasippoq inoqarpasinnani. Assimi qalipaatit ersaripput.'
Foto: Milo Rosing
'Sammisaq: Sinnattut. Assilisanni illit sinnattut allalluunniit sinnattui takuneqarsinnaavoq. Assiliisoq: Aqqalu Augustussen. Assi: 'Inuusuttoq imminut tatigisoq'. Assi neriulluarnertaqarlunilu qungujunnartortaqarpoq. Meeraq pissilersoq takuneqarsinnaavoq, assilu torrallataavoq, tunuanilu assigitinneqartoq aamma iluaqutaalluni.'
Foto: Aqqalu Augustussen
'Sammisaq: Ammaneq. Nammineq aalajangiisinnaatitaanerit assilisimavat. Ajugaasoq assiliisorlu: Helene Willumsen 'Silaannarmi sarsuaneq'. Assi taalliortorpalaartuuvoq oqitsuulluni arnarpaluttuullunilu. Assimi tunuani qalipaatit apeqqutaaqataapput. Assi takullugu soorlu sinnattumiilluni, sarsuasullu takuneqarsinnaasut takullugit soorlu sinnattumiilluni. Takullugit nuannersimassaqaat.'
Foto: Helene Willumsen
Seneste nyheder / Nutaarsiassat kingulliit