Mandag, marts 17, 2014 - 17:45

Assi kusanarnerpaaq toqqarneqassaaq

Nittartakkami isi.nebula.gl-imi assitaritinneqartut
Foto: Skærmbillede fra isi.nebula.gl
Nunatsinni illoqarfinnit assigiinngitsunit inuit assilisimasatik nittartakkamut isi.nebula.gl-imut nassiussinikuupput. Assini nassiunneqartuni 40-t kusanarnerpaat toqqarneqarput, ajugaasorlu toqqarneqangajalerpoq

Nunatsinni illoqarfinni assigiinngitsuni arfinilinni aamma Københavnimi takutisassiarineqartussat assit 40-t kusanarnerpaat nittartakkamut isi.nebula.gl-imut nassiunneqarsimasut Sisimiuni Taseralimmi sisamanngorpat marsip 20-ani nalunaaqutaq 16.30 tusarliunneqassapput.  

Assinik 40-t takutitassiarineqartussat 'Isi øje eye'-mik taaneqarpoq. Inuinnaat 171-it nunatsinni assilisaminnik nassiussinikuupput, taakkunanilu 40-t toqqarneqartut 'Isi øje eye'-mi takutitsinermi assit takutitsinermi peqataatinneqassallutik. 

- Unammisitsineq ukioq kingulleq aggustimili ingerlanneqarpoq, maannakkut atuaganngorlugu piareersimalerpoq. Assiliisut paasitinneqareerput assilisaat atuakkami ilaassasut, kikkulli atuakkami peqataanerat aamma tupaallannartoqarpoq. Arlaleriarlunga oqarusuttaraluarpunga, Pipaluk Lykke Løgstrup suliffeqarfimmi Nebula-meersoq oqarpoq. Suliffeqarfik taanna assinik unammisitsisuuvoq. 

Assit sorliit 40-t toqqarneqassanersut inuit pingasut aalajangiisinneqarput, assiliisartoq atuakkiortartorlu Ivars Silis, filmiliortartoq producererlu Aka Hansen kiisalu kulturikkut illorsuarmi Taseralimmi Sisimiuniittumi pisortaq Arnajaraq Støvlbæk. Maannakkut assit 40-t toqqarsimalerpaat. 

- Assinik takusaqartuarpugut tamatta. 'Isi øje eye'-p takutissavaa avatangiisit suut inuuffigineqarnersut. Assini oqaaseritinneqartut ilaat pikkunartuupput, tassani assiliisut inuunertik assinngortillugit oqaluttuarisarmassuk, kiisalu nunarsuaq qanoq isiginerlugu aamma oqaluttuarisarlugu, Ivars Silis oqarpoq. 

Kikkuuvugut suuvugullu
- Unammisitsisoqarnerani Kalaallit Nunaanni inuit kikkuunersugut suunersugullu assilianngorlugu oqaasinngorlugulu takutinniarneqarpoq. Inuit assiliillaqqinnerminnik ilisimaneqanngitsut toqqarneqartunut ilaapput, Pipaluk Lykke Løgstrup nassuiaavoq.Namminersorlutik Oqartussat kulturikkut aningaasaateqarfia kiisalu Nunafonden tapiissuteqarsimanngitsuuppata una piviusunngorsimassanngikkaluartoq oqarpoq. 

Aamma allanik tapiisoqarpoq, soorlu Sisimiuni Lions Club, Sct. Georgs Gildet, Pisiffik aamma Hotel Sisimiut.

Suliffeqarfiup Nebulap tullissaani ’Kingornussat' suliarissavaa, tassani inuit kingornussiarisartagaat sammineqassallutik. Geologi professorilu Minik Rosing aamma tassani peqataassaaq, tassani kingornussiarisimasamini nuannarinerpaasani oqaluttuarissallugu. Kikkut tamarmik peqataasinnaapput soorlu 'isi øje eye'-mi kikkulluunniit peqataasut. 

Paasissutissat nebula.gl-mi atuakkit

Seneste nyheder / Nutaarsiassat kingulliit