Nerisassanik pilersuineq Nunat Avannarliit Killiit Siunnersuisoqatigiivisa aqunniarpaat
Nunani avannarlerni killeqarfiit akimorlugit suleqatigiinnissaq soqutigineqartorujussuuvoq. Nunat Avannarliit Killiit Siunnersuisoqatigiivisa avannaani nerisassanik pilersuinerup nukittorsarneqanissaa sulissutigaa
Inatsisartut siulittaasuat Lars-Emil Johansen tallimanngormat Nunat Avannarliit Killiit Siunnersuisoqatigiivisa Nuummi Hotel Hans Egedemi isumasioqatigiinnerannut tikilluaqqusivoq.
Tikilluaqqusilluni oqalugiarnermini Lars-Emil Johansenip erseqqissarpaa nunat avannarliit killiit suleqatigiinnerisa pingaaruteqassusia, amanna Kalaallit Nunaannut, Savalimmiunut Islandimullu iluaqutaammat - aammalu Savalimmiuni Nunatsinnilu politikkikkut ineriartornermut iluaqutaalluni.
Tamatuma kingorna Nunat Avannarliit Killiit Siunnersuisoqatigiivisa generalsekretæriat Thordur Thorarinsson Siunnersuisoqatigiit suliaannik, ingerlatsinerannik, aaqqissuussaanerannik Siunnersuisoqatigiinnullu atugassarititanik iternga tikillugu paasissutissiivoq.
Isumasioqatigiinneq Inatsisartunut ilaasortanit, partiini siunnersortinit qaffasissumillu atorfilinnit amerlasuunit malinnaaffigineqarpoq. Isumasioqatigiinnermi aamma peqataavoq Islandip Nuummi generalkonsuleqarfissaani Generalkonsuli Pétur Ásgeirsson.
Saqqummiussinermi Siunnersuisoqatigiit inassuteqaataannik qitiusumik samminniffiusumi, arlalinnik apeqquteqartoqarpoq. Eqeersimaartumik tunniusimaneq soqutiginninnerujussuarlu tamanna nunani avannarlerni killerni suleqatigiinnermut isumalluartitsivoq.
Siunnersuisoqatigiit suliaannik soqitiginninnerujussuaq qularnanngivissumik pissuteqarpoq Nunani Avannarlerni Killerni Siunnersuisoqatigiit inassuteqaataat martluk, ukioq manna kingusinnerusukkut Inatsisartut ukiakkut ataatsimiinneranni oqaluuserineqartussat.
Siunnersuisoqatigiit generalsekretæriata peqataanera aamma Nunat Avannarliit Siunnersuisoqatigiivisa ataatsimiittarnissaannut kiisalu Nunat Avannarliit Killiit Siunnersuisoqatigiivisa sammisaqarlutik ataatsimeersuarnissaannut, 2014-imi januaarimi Savalimmiuni ingerlanneqartussamut, piareersaataapput. Sammisaqarluni ataatsimeersuarnermi Nunani Avannarlerni nerisassanik nammineq pilersuinitta nukittorsarnissaanut periarfissat sammineqassapput.