uran pillugu oqallinneq
Randi Broberg: Uran innuttaasuni taasissutaali
Partii Inuit sinnerlugit Inatsisartuni ilaasortaq Randi Broberg uranimut naaggaarluinnarnerup atorunnaarsinnissaanut ingerlaannaq akuerseqataanianngilaq
Partii Inuinneersoq Randi Broberg Naalakkersuisunut piumasaqarpoq uran pillugu inuttaasut taasitinneqarnissaannik. Uranimut naaggaarluinnarnerup atorunnaarsinnissaanik Naalakkersuisut siunnersuutaat taamaasilluni naalakkersuisooqataasut ingerlaanneq tapersinngilaat.
- Aap Naalakkersuisooqatigiinnut suleqataasumi Partiimiippunga, kisianni taamaakkaluartoq suna tamaat isumaqataaffigissagaanni piviusorsiunngilaq. Suleqatigiikkaluarluta pingaartitagut aamma assigiinngissuseqarput, Randi Broberg oqarpoq.
Taanna isumaqarpoq isummernissamut tunngavissat sukumiinerusut suliarineqaqqaartariaqartut. Randi Brobergip aamma innersuussutigaa uranimut naaggaarluinnarnerup atorunnaarsinnissaata kingunerisinnaasai maanna immikkut ilisimasalinnit misissorneqarnerat suli ingerlasoq.
- Nunani allani misilittakkat pillugit paasissutissat amigaatigaagut, minnerunngitsumillu inuiaqatigiit akuutinnissaat sukumiisumillu paasissutisseeriaseq allaanerusoq atorlugu apuussivigineqartarnissaat amigaatigaarput, Randi Broberg oqarpoq.
Taassuma piumasaraa innuttaasut avatangiisillu sunnerneqannginnissaata uppersarneqarnissaa.
- Qanoruna ililluni oqaasiinnaanani avatagiisinut uumasunut inunnullu ajoqusiinngittumik piaasoqarnissaa qulakkeerneqarsinnaasoq? Randi Broberg aperivoq.
- Uanga akisussaaqataarusunngilanga aningaasameernerinnaq, piinnarlugu kingulissatta naalliuutissinneqarnissaannut, Randi Broberg oqarpoq piumasaralugulu sukumiinerusumik innuttaasunut paasititsiniaasoqarnissaa.
Uranimut naaggaarluinnarnerup atorunnaarnissaa Inatsisartut ukiaanerani katersornerminni siullermeerlugu aappassaanneerlugulu oqaluuserissavaat oktobarip arfineq pingajuani 24-anilu. Naatsorsuutigineqarpoq pingajussaanneernera upernaamut pissasoq.