Aalisakkat orsoqarluartut meeqqanut ADHD-ertunut iluaqutaapput
Inatsisartut maannakkorpiaq meeqqat ADHD-mik nappaatillit ilaqutaallu oqaluuseraat
Københavnip ilisimatusarfiani ilisimatuut meeqqanut inuusuttunullu tarnip nakorsat peqatigalugit nalunaarusiamik annertuumik naammassinneqqammerput tassani paasiniarneqarsimalluni nerisat meeqqanut ADHD-ertunut qanoq sunniuteqartarnersut. Nalunaarusiami takuneqarsinnaavoq meeqqat ADHD-ertut nerisaasa allanngortinnerattigut periarfissat, sulili suliassaqarfik taanna naammattumik ilisimasaqarfigineqanngilaq.
Inatsisartut ualimut oqaluuserissavaat Olga P. Berthelsenip Inuit Ataqatigiinnersup Karl Lyberthillu Siumeersup aalajangiiffigisassatut siunnersuutaat meeqqat ADHD-mik nappaatillit ilaqutaallu pillugit imaqartoq, meeqqammi nunatsinni ADHD-mik nappaateqartutut paasineqartartut amerliartorput.
Københavnip ilisimatusarfiani nalunaarusiami annertuumi meeqqat ADHD-mik nappaatillit nerisaasa sunniutai pillugit ilisimatuussutsikkut atuakkit misissorneqarput:
– Nalilerparput suliassaqarfimmi suli annerusumik ilisimatusaqqittoqartariaqartoq, imatulli isikkoqarpoq nerisat allanngortinneratigut meeqqat ADHD-ertut pitsaanerusumik inissisimalersinnaallutik, Det Natur- og Biovidenskabelige Fakultetimiit Institut for Human Ernæringimi ilisimatooq Kim Fleischer Michaelsen oqarpoq.
Misissuinerit ilaasa takutippaat aalisakkat orsoqarluartut nappaatip sunniutai annikillisittarai. Misissuinerit allat sunniuteqartoqarneranik takusassaqanngillat. Nerisanik misissuinerit isumalluarnarput. Tassani misissorneqarpoq nerisat meeqqat sapigaanngik imaqarnersut. Sulili ilisimasatigut amigaateqarpoq meeqqat ADHD-ertut sorliit nerisat allanngortinnerisigut ikiorserneqarsinnaanersut, sinniutaasorlu piffissami sivisuumi atatinnaanersoq nerisallu allanngortinnerat meeqqap peqqissusaanut qanoq sunniuteqarnersut. l
Nerisat allanngortinnerat tamanut iluaqutaanngilaq
Nalunaarusiami takuneqarsinnaavoq meeqqat ADHD-ertut tamarmik nerisat allanngortinneranik iluaquserneqanngitsut, sulilu ilisimanngisarpassuaqarluni.
– ADHD-t assigiingnitsut arlaqarput, ajoqutillu ilaat immaqa kingornuttakkanut avatangiisinullu tunngasinnaapput, meeqqanut inuusuttunullu tarnip nakorsaa nakorsaaneq Tine Houmann oqarpoq.
– Ilisimavarput meeqqat ADHD-mik nappaatillit nakorsaatinut nerisallu allanngortinnerannut assigiinngiiaartumik qisuariartartut. Misissuinissaq pisariaqarpoq meeqqat sorliit nerisat allanngortinnerannik iluaquserneqarnersut, paaserisupparpullu kingornuttakkatigut avatangiisitigullu arlaatigut tikkuussisoqarsinnaanersoq.
Meeqqat nerisaqarneranut ilisimatuup Kim Fleischer Michaelsenip erseqqissarpaa angajoqqaat meeqqamik nerisai allanngortittariaqangnikkaat ilinniarsimasunik siunnersorneqaqqaaratik.