Palasi nunaqarfimmi ikiuutissaaq
Maannakkut helikopteri aamma snescooterillu aqqutigalugit ilagiinni atorfillit Nutaarmiunut apuunniarput. "Pisoq ajoqaaq" Biskorpip allaffianit oqaatigineqarpoq
Ualimut ajoqi Thomas Svendsen nunaqarfimmit allamit Nutaarmiunut snescooterimik ingerlaarpoq nunaqarfimmi innuttaasunut tupaqqaqisunut annertoqqutaajartorluni.
Tamatuma nalaani Upernavimmi palasi Paulus Christensen, nunaqarfik ullaaq inunnik pingasunik inuarfiusimasoq orninniaraluarpaa. Aallarnissarli silarlumit akornuserneqarpoq.
- Helikopteri tingisinnaannginnami. Aqagu ullaakkut misileeqqissaagut, Paulus Christensen ilisimatitsivoq. Taassuma Qaasuitsup Kommuniani inunnik isumaginninnermik suliallit ingerlaqatigissavai.
Nuummi Biskorpip allaffia namminersorlutik oqartussat suleqatigalugit innuttaasunik ikiueqqaarnissamik aallartitsipput.
- Pisoq ajorluinnarpoq soorunami suut tamaasa atorlugit ikiuunniarsarissaagut. Ullumi ullunilu tullerni kikkulluunniit ikiuukkiartortissinnaasagut tamaasa aallartissavagut. Nunaqarfimmi mikisunnguamik oqaluffeqarpoq aalajangersimasumillu ajoqeqarani. Qujanartumik ajoqi Thomas Svendsen, snescooterimik nunaqarfiliarpoq, Biskorpip allaffianit Morten Nornild oqarpoq.
Nal. 16 missaani politiit suli oqaatigisinnaanngilaat toqutsinermut suna pissutaanersoq, ilimagineqarporli ilaqutariit iluanni pisoq alianartoq.
- Ullup annerpaartaa inuit marluk aqqunarujussuarsimasut nakorsartinneqarsinnaanissaat ilungersuutigaarput. Tamatuma kingorna susoqarsimanera misissuiffigineqassaaq, Politimesterembedeqarfimmi allaffeqarfiup pisortaa Claus Risbjerg.
- Kikkunuku toqutaasut?
- Suli kikkuuneri paasinngilagut
- Pinerlineqartut akornanni meerartaqarpa?
- Aamma taanna pillugu suli paasissutissiisinnaanngilanga.
- Sakkut suut atorneqarsimappat?
- Paasiniaanerup kingorna aatsaat tusarliunneqassaaq. Kisianni oqaatigineqaraluartutut aallaasersortoqarsimanngilaq, Claus Risbjerg akivoq. Taanna aamma toqoraasimasuutitaasoq nunaqarfimmi ullumi 11.15 pissanganartorsiutaanngitsumik tigusaasoq pillugu oqaasissakippoq.
Tigusaasoq politiinit suli killisiorneqanngilaq.
- Soorunami taassuma pisumik oqaasissai soqutiginarput sukkanerpaarlu atorlugu killisiorneqassalluni, Claus Risbjerga 20-nik ukiulik pillugu oqarpoq. Sermitsiaq.AG'p paasisai naapertorlugit tigusaasoq siornatigut politiinit ilisarisimaneqanngilaq.