• Del
•  
• Print
• +299 38 39 50 AG
• +299 38 39 80 Sermitsiaq

Af redaktion 29-07 2010 - 13:48

Inuit Ataqatigiit Demokratillu assigiinngeqaat.

Ukiup ataatsip ingerlareernerani apererusunnarpoq partiit taakku marluk suna atassutigineraat

Tassaasinnaanngilaq partiit marluk tunngavimmikkut isumaat. Partiip aappa saamerliuvoq, aappaalu talerperliulluni. Tunngavimmikkut assigiinngeqaat.

Taamatut aperinissaq pissutissaqarluarpoq, uumami sapaatip akunnerata naanerani IA aasaanerani Qoornumi ataatsimiissaaq.

Ukiup ataatsip matuma siorna innuttaasut allannguisoqarnissaanik kissaateqarnerat naammassineqarsimanersoq IA-p nalilersortariaqarpaa. Aamma isummerfigisariaqarpaa innuttaasut allannguinissamik kissaateqarnerat piviusunngortissinnaanerlugu.

Taamanikkut takorluugaqarluarput – taamaannerpami? Sulili piviusunngortinneqanngillat.

Aningaasaqarnikkut ineriartornissaq nunatta pisariaqartitaa neriorsuutigineqartorlu IA-p Demokratit isumaqatigalugit piviusunngortissinnaavaa? Pissaanermik tigusinissaq Siumullu sunniuteqartinniarnagu isumaqatigiissutigissallugu naammanngilaq.

Allanik aamma pisoqarnissaa pisariaqarpoq.

Issakkunni Demokratiniit naalakkersuinikkut oqaaseqartartoq Niels Thomsen gruppillu siulittaasua Justus Hansen Sermitsiamut allagaqarput.

Ammasumik oqariartuutigineqarpoq IA aamma Demokratit tunngaviusumik isummamikkut assigiinngitsorujussuusut

Aamma ammasumik nassuerutigaat Naalakkersuinermi Inatsisartunilu ilaasortat suleqatigiinnerminnik atassuteqaateqartut, naalakkersuinikkut anguniakkat qinigaanerminni aallaaviusut pinngagit.

Isummanik aalajangiussaqarneq meerarpaluttutut piviusorsiunngitsutullu isigaat

Nunarput pillugu suleqatigiinnissaq pingaarnerpaatut isigaat, taannalu aqqutissatuaasoq.

Oqaatiginngilaalli suleqatigiinnerminni suna anguniagarineraat, sunarpiarlu suleqatigiissutigineqarnersoq.

Pakatsinartua uaniippoq suleqatigiinnerminni nutaanik pilersitsisimanngimmata. Siumup siuttuuneraniit allanngortoqarsimanngilaq

Qulequttat pingaaruteqarluartut isummerfigineqarsimanngillat: Aningaasatigut siuariartorneq, uran, akileraartarneq, aalisarneq, attaveqaatit, ilinniartitaaneq, peqqinnissaq, najugaqariaaseq, Alcoa, nunanit allaniit nunasisut, silap allanngoriartornerata kingunerisai, utoqqarnut politikkeqarneq meeqqeriveqarnerlu kiisalu kommunerujussuit suliassaat.

Suli oqaluinnartoqarlunilu pipallattumik aalajangiisoqartarpoq, innuttaasullu ilarujussuini suli atugarliortoqarlunilu pissutsit ajorsiartorput.

Naalakkersuisooqatigiit tinnersarneqarnissaat piffissanngorpoq. Qoornumilu eqqissimaarfiusumi Inatsisartuni Naalakkersuisunilu inuutissarsiutigalugu naalakkersuinermik suliallit piumasaqarfigissallugit tulluarpoq.

Naammaginngilarput asuli issiaannarluni ilorrisimaarnersi Siumut sunniuteqartinnaveersaaginnarlugu

Tamanna naammanngilaq. Naalakkersuinikkut suliaqartoqarnissaa piumasaraarput, aningaasatigullu ineriartortoqarnissaa kissaatigaarput, taamaaliornikkut innuttaasut ilarujussui pitsaanerusunik atugassaqalerlutik.

Siunissamik pitsaanerusumik toraagaqartugut uppereqqilerusupparput, sulilu ukiuni 30-ni susoqarani, allannguinerit asuli eqqarsarluaqqaarani pilersaarusiugaanngitsumillu takkuttarfiani.

IA Demokratillu immaqa qinigaaffinni marlunni anguniakkaminnik piviusunngortitsinissartik angusinnaavaat.

Suniarnerluni saperasilu takutitsigitsi! - asuli suut tamaasa ataatsimiititaliarsuarnut suleqatigiissitanullu qanorluunniit kinguneqarsinnaasunut miloriussuunnagit.

Immikkut ilisimasallit sulisilersinnagit tunngaviusumik naalakkersuinikkut aalajangiisariaqarpusi naalakkersuinikkullu pingaarnersiuillusi.