• Del
•  
• Print
• +299 38 39 50 AG
• +299 38 39 80 Sermitsiaq

Af redaktionen 28-07 2010 - 09:15

Oquk tusagassiutinit sammineqalermat taamaattumik tunngavissaqarluarpoq. Oquup inuit napparsimalersittarpai, ajornermillu pisoqassappat napparsimarujussualersinnaallutik. Oquup ajornartorsiutaanera annertoorujussuummat taama isummernissamut tunngavissarpassuaqarpoq. Inissiat amerlanersaat pisoqaapput, inissianilu silaannarissaatit ajorluinnarnerat oquup siaruarnissaanut pissutaalluinnarpoq.

Inatsisartunut ilaasortap aningaasaqarmerullu ataatsimiititami siulittaasup Naaja Nathanielsen-ip (IA) ajornartorsiutaasoq takusinnaavaa. Oqullu qanoq annertutigisumik ajornartorsiutaanersoq naalakkersuisooqatini ineqarnermut naalakkersuisoq Jens B. Frederiksen (D) misissuiffigineqartariaqannginnersoq taamaattumik aperisimavaa. Annertuumilli misissuinissamut aningaasanik atugassanngortitsisoqassanngitsoq naalakkersuisoq akivoq, tamanna inuiaqatigiinnut 105 millioner koruunit tikillugit akeqassammat.

Nutaanik inissialiornissamut aningaasat atorumaneruai. Taanna kisiat eqqarsaatigalugu isumaliutersuut eqqortoq. Sivisuumik annertuumillu isumaginninnissaq pisariaqartinneqarpoq, inissiat pisoqqat aserfallassimasullu taarserneqarnissaat neriuutigissagutsigu.

Ukiulli arlallit ingerlassapput, tassami ukiut qulit sinnerlugit ingerlasinnaallutik. Oquk maannakkorpiaq aaqqiivigineqartariaqarpoq. Inigisap iluarsaannissaani ininik attartortut allaffimmiunut sorsuartut imminnut isigisunut sorsuutiginnittariaqanngillat, pingaartumik peqqinnissaq navianartorsiortinneqartillugu. Oqoqarneralu pasillugu inimik attartortoq saaffiginnippat sukkasuumik qisuariartoqassaaq qanoq iliuuseqartoqarlunilu. Pissutsit ilungersunarnerat takuneqartinnagu sapaatit akunneri, qaammatit aammalumi ukioq ilivitsoq tikillugu ingerlasariaqanngillat. Tamatumani Namminersorlutik Oqartussat kommunellu inissiaatileqatigiiffii akisussaanerminnik ilisimannittariaqarput, inissiallu ineqarfigineqarsinnaasut pillugit inatsisiliorneq malittariaqarlugu.

Siunnersuutit tunngavissallit Demokraatit naalakkersuisuutitaqartut nuannarigaat ilisimavarput. Landskarsi aningaasatigut annertuumik eqqorneqarsimasoq aningaasarpassuarnik qanoq ililluni pissarsisinnaanersoq aningaasaqarnermut naalakkersuisoq Palle Christiansen (D) sapaatip akunnerata siuliani siunnersuuteqarfigaarput. Maannalu taamaalioqqikkumavugut.

'Nakkutilliisumik' sooq naalakkersuisut pilersitsissanngillat, inunnik suliaminnik ilisimasaqarluartunik inuttalimmik, ilaatigut saaffiginnittunik sullissisussanik. Tassunga ininik attartortut nalunaaruteqarsinnaassapput ajornartorsiutigimagunikkit anersaartuutitik, isit sorluillu ajoquteqarsimappata, quersortarunik, sakissamikkut anniaateqarunik, bihulemikkut aseruuttoorsimagunik, anersaartorniarnertik ajornartorsiutigigunikku, niaqorlukkunik, aammalu allanik takussutissaqarunik inimi oqoqarnera pissutigalugu.

Oquk qanoq annertutiginersoq taamaalilluni nalunaarsorneqarsinnaassaaq, tamatumunngalu atatillugu toqqaannartumik paasissutissiissutigalugu inip iluata silaannaa qanoq pitsanngortinneqarsinnaanersoq. Tamatuma kingorna ingerlaannaq suliniuteqartoqassaaq, pisariaqarpallu ajoqutaasoq iluarsaallugu.

Taamatulli nakkutilliisoq inissinneqassanngilaq allaffimiumut imminut sorsuartut isigisumut, INI-mut aamma Iserimmut. Nakkutilliisoq arlaannut attuumassuteqassanngilaq, suliaminik ilisimasaqarluartuussalluni namminerlu atugassani atorlugit sulissalluni, allaffimmiullu imminnut sorsuartut isigisut naalakkernissaannut pisinnaatitaaffeqassalluni.

Kingullertut minnerunngitsumillu tikuarumavarput paasisitsiniaaneq ingerlanneqaqqissasoq, ukiut arrallit matuma siorna INI-p KNR aqqutigalugu aallakaatissimasaa. TV-kut ussassaarutit, inip silaannaa silaannarissaanikkut qanoq pitsanngortinneqarsinnaanersoq aamma siunnersuutinik pitsaasunik allanik imallit. Tamannalu akeqanngilluinnarpoq.