SAQQUMMERSITSINEQ
– Kulturiuvugut
Nunatsinni eqqumiitsuliortut peqatigiiffiat KIMIK, Katuami ukiumoortumik saqqummersitsinerminik ammaavoq. AG-p eqqumiitsuliortut ilaat ammaanersiornermi peqataasoq malinnaaffigaa.
Kristine Spore Kreutzmannip skuut sungiusaatini tusarnaarutinilu ateriarlugit angerlarsimaffimmini timigissarluni aallartippoq. Naak qasugaluarluni nukissaqarpianngikkaluarlunilu.
Timimik aalatitsineq iluaqutaajuaannarpoq, oqarpoq.
Sapaatip akunnerini kingullerni ulapittorujussuusimapput ukiumoortumik ataatsimeersuarlutik saqqummersitsinerlu sioqqullugu suliassarpassuaqarlutik.
Kristine Spore Kreutzmann, eqqumiitsuliortut allat aqqaneq-marluk peqatigalugit Nuummi kulturip illorsuani Katuami saqqummersitsivoq. Kalaallit eqqumiitsuliortut peqatigiiffiat KIMIK ukiut tamaasa upernaakkut Nuup Eqqumiitsulianik Saqqummersitsivia aamma Katuaq paarlakaajaallugit saqqummersitsisarpoq, sinerissami nunanilu allani ataatsimoorluni aamma saqqummersitsisarluni.
Silarput — ukioq manna upernaakkut saqqummersitsinermi qulequtarineqarpoq. Silarput assigiinngitsunik isumaqarsinnaavoq: silarput, silaqassuserput, nunarsuarmi aaqqissuussaanerput, minnerunngitsumillu silap anersaava.
Suliat 89-t ukioq manna saqqummersinneqarput. Kristine Spore Kreutzmannip suliai akrylimit qalipagaapput marriallu tarrarsuutitallit.
- Piffissaq kingullerpaaq atorlugu suliaapput. Suliareqqaakkakka saqqummersitassakka marrianut uutsivimmi qaaramik. Naluara sooq. Taamaattumik sukkasuumik nutaanik suliaqartariaqarama, Kristine Spore Kreutzmann oqarpoq.
Ilagisartakkanit akuerineqartut
Katuap paarlersuani issiaviit ilaanni issiavoq oqalugiaatissanilu sungiusarlugu. Pissangalaarpoq. Angutip assiliivillip sumulluunniit aallaraangat malinnaaffigisarpaa filmiliaralugulu. Taanna piviusulersaarusiortuuvoq peqatigiiffiup aappaagu ukiunik 30-nngortorsiornissaanut atatillugu KIMIK pillugu piviusulersaarusiortoq.
Kristine Spore Kreutzmann eqqumiitsuliortut peqatigiiffianni KIMIK-mi 20-t sinnerlugit ilaasortaqartumi siulittaavoq. Peqatigiiffik 1995-imi pilersinneqarpoq Nuummilu Nuutoqqami nammineq sannaveqarluni.
Peqatigiiffik KIMIK sapaatip akunnerani kingullermi saqqummersitsinissaq aqaguttoq ukiumoortumik ataatsimeersuarpoq, Kristine Spore Kreutzmannilu siulittaasutut qinigaaqqilluni.
Ammaanerullu tungaanut minutsit qulit qaangiupput. Kristine imermik tigusisarpoq. Here goes. Utertoqanngilaq. Inunnik ulikkaarpoq. Inuit 150-it 200-llu akornanniittut saqqummersitsineq takuniarpaat. Inuppassuit. Inuit imminnut qanilleriasaarput.
Saqqummersitsinerup ammarnissaanut minutsit maanna quliinnanngorput. Kristine imermik imerfimmut aallerpoq. Piffissanngulerpoq. Utertoqarsinnaajunnaarpoq. Inuppassuaqarpoq. Inuit 150-200-t saqqummersitsineq takuniarlugu takkussimapput. Kakkaak inuppassuit. Inuit sakattaatingajallutik qerlertoruupput.
Kristine Spore Kreutzmann tikilluaqqusilluni oqalugiarpoq. Tupaallaatigineqaqisumik Maria Panínguak’ Kjærulffip, KIMIK-mut ilaasortap, mikrofoni tiguaa Kristine Spore Kreutzmannillu peqatigiiffimmi sulinera pillugu tunissuteqarfigalugu nersorniarlugulu. Taassumami KIMIK uummateqarfigilluarmagu.
- KIMIK-mi sulinera nuannaraara. Suliassarli aamma annertuvoq, kajumissutsitsinnillu sulisarluta. Akissarsiaqarnata sulisarnerput uggornalaarpoq. Siulersuisut akissarsiaqarnissaat kissaatiginartissinnaagaluarpara, oqarpoq.
Tuullik
Kristine Spore Kreutzmann suliat saqqummersinneqartut eqqaanni nikorfavoq takuniaasullu ilaat nuannaarluni oqaloqatigalugit. Uluai aappillersimapput. Maanna oqalugiarnissani naammassereerpaa.
- Allaannginnami qasujunnaarsimasunga, immaqa pissanganeq nuannaarnerlu pissutigalugit.
Kristine Spore Kreutzmann qungujulaqaluni oqarpoq.
Saqqummersinneqartut alutorineqarluarput ilaallu ingerlaannartumik tunineqarlutik.
Kristine Spore Kreutzmannip ilaatigut saqqummersippai tuullik akrylimik qalipagaq, neriusaap saavaniittoq. Tuullik oqalunnermut kulturimullu ilisarnaataavoq, neriusaarlu assigiinngiiaartuunermut pileqqaarnernullu takussutissaalluni.
- Eqqumiitsuliorneq inuiaqatigiinnut pingaaruteqartorujussuuvoq. Ilaatigut kulturerput tassaniippoq, kinaassutsitsinnillu ersersitsinissamut periarfissilluta. KIMIK-mit saqqummersitsinermi eqqumiitsuliat assigiinngitsorpassuit takutinneqartarput. Eqqumiitsuliortut eqqumiitsuliaminnik saqqummersitsigaangata tupaallattarpunga. Kalaallit Nunaanni eqqumiitsuliornermi qanoq pisoqartarneranik takutitsisarmat, Kristine Spore Kreutzmann oqarpoq. Taassuma saqqummersitsinerup ammarneqarnera naammagisimaarpaa.