Kalaallit Atuakkiortut Parisimi atuakkanik saqqummersitsinersuarmi peqataassaaq

Kalaallit atuakkiaat Parisimi apriilip qaammataani takuneqarsinnaassapput.

Festivalimut peqataajumallutik qinnuteqaataat akuerineqarpoq. Peqataanerlu isumaqarpoq kalaallit atuakkiaat franskisuunngortillugit nittarsaanneqarnissaat tuniniarneqarsinnaanissaallu, taamatullu atuakkat franskisoortut kalaallisuunngorlugit nunatsinni nittarsaanneqarlutillu pisiarineqarsinnaanissaat.

- Piareersarluta aallartileratta ilimangisimanngikkaluarpara, maannamutut taama angusaqartigereersimatigissalluta, tassami aatsaat siullerpaamik peqataaleratta, Juaaka Lyberth, KA-p aamma GreenLitsip suliassaanik ataqatigiissaarisuusoq, oqarpoq nangillunilu:

-  Inuilli nunatsinnik soqutigisaqarluartut attavigilernerisigut, Parisiinnaanngitsumi aammali Montreal, Canadami franskisut oqaaseqarfiusumi, suleqatissatsinnik attaveqarfeqarluarlerpugut. Ikioqatigiilluarnitsigullu ‘uagut Parisimi aaqqissussassavut’ pilersaarusiorpavut. Parisimiinnitsinni suleqatigiissutissanik arlalinnik atsioqatigiilluta isumaqatigiissuteqarnissarput neriuutigilluinnarpara, taamaasiornertigut suli annertunerusumik kalaallit atuakkiaasa franskisuunngortillugit nittarsaanneqartarnissaat, tamatumuunakkullu nunatta tamarmi nittarsaanneqarnera aqqutissiuunneqassammat.

Siorna 2023-mi KA-ip siulittaasua Juaaka Lyberth, siulittaasup tullia Katti Frederiksen, taamanilu allatsi Pipaluk Kristensen, Festival du livre de Parisimut paasisassarsiorlutik angalapput.

Parisimi sammisassat

Juaaka Lyberth Katti Frederiksenilu Parisimiinnerminni assigiinngitsunik pilersaaruteqarput. Atuakkanik kalaallisuunik franskisuumut nutserneqareersimasunik tuniniaatingalutik saqqummersitsissapput.

Katti Frederiksenip meeqqanut atuakkiaa "Issittumi aputip naasunngua" franskisuunngortillugu saqqummersissavaat.

Atuakkat saqqummersinneqartut ilaat postkortiliaralugit tuniniassavaat aamma pjecit franskisuut agguaatissavaat, nunatsinnilu atuakkiortarneq pillugu paasissutissiissallutik.

Suleqatigiinnissamik isumaqatigiissutissaq Daniel Chartier, Montreal Universitetimeersoq peqatigalugu atsiussavaat. Kalaallit atuakkiaat franskisuunngortillugit Montreal, Canadami saqqummersinneqartartussat pillugit isumaqatigiissallutik.

Ilisimatusarfimmi sulisut assigiinngitsut aamma naapinnissaat pilersaarutaavoq.

Ataatsimiinneq ilaatigut Nuuk Parisillu suleqatigiinnissaanut tunngassaaq, tassani kalaallit atuakkiaannut tunngassalluni. "Bussimi naapinneq" aamma "Naleqqusseruttortut" franskisuunngortinneqarnissaat aamma oqaluuserineqassalluni.