Arctic Sounds ukiuni qulini

Arctic Sounds nunatsinni, nunani avannarlerni Inuit nunaannilu nipilersortartut saqqummiunniarlugit festivaliuvoq. Festivali kajumissutsiminnik ikiuuttuniit aningaasarsiutigineqarani ingerlanneqartarpoq, festivalilu ulluni tallimani ingerlanneqartarluni. Aaqqissueqataasut ilaat Laura Lennert Jensen 17-inik ukioqarlunili Arctic Sounds 2014-imi aallarteqqaarmat ikiuuttarpoq, 2017-milu kajumissutsiminik aaqqissueqataasutut suleqataasalerpoq. Taamanikkumiillu festivalit tamaasa peqataaffigisarsimavai.

- Soorunami nipilersorneq pingaarnerpaatittuaannarparput, aammali inuit inuunerminnik allannguissutigisinnaasaannik misigisaqartinnissaat anguniagaraarput, Laura Lennert Jensen oqarpoq.

Arctic Sounds Sisimiuni sumiiffinni assigiinngitsuni tusarnaartitsisarpoq, ukiullu ingerlaneranni festivali Sisimiut avataani aamma ingerlanneqartarpoq. Assersuutigalugu Nuummi, nipilersortut Sisimiunut angalanerminni ukiut tamaasa aqqusaartarpaat. Arctic Sounds aamma Arctic Umiaq Line suleqatigalugu Sarfaq Ittummi Nuummiit Sisimiunut angalanermi aamma imaani tusarnaartitsinikuuvoq, ilaasut umiarsuarmut nipilersornermik misigisaqartillugit.

Ukiuni kingullerni taalliortut nunanit assigiinngitsuneersut sisamat Kangerlussuarmiit Sisimiunut ulluni tallimani qimussimik angalatinneqartarput, qimussimik angalanerminni erinarsuutinik taalliussapput Arctic Sounds-imilu saqqummiullugit. 2014-imi festivali aallartimmat ulluni pingasuni ingerlanneqartarpoq, maannali ulluni tallimani ingerlanneqartalernikuuvoq.

- Ukiut qulit matuma siorna aperisimasuugumma festivalip taama angitigilernissaa ilimagisimaneriga, angersimassagaluarpunga, taamatummi angusaqarnissarput anguniartuarnikuuarput. Kalaallit Nunaanni nipilersortartut nunani tamalaani nukittorsarnissaannut peqataarusuppugut, taamatullu angusaqarsinnaassanngikkaluarpugut taama angusaqarluartigisimanngitsuugutta.

Festivali immikkuullarissoq

Aaqqissuisut nipilersortartut akornanni angutit arnallu naligiinnerat pingaartitaraat, taamaattumillu Kyechange Pledge-mut atsioqatigiipput, tassani piumasaqaataavoq nipilersoqatigiit affai arnaassasut imaluunniit suiaassuseqanngitsuussasut, Laura Lennert Jensen oqarpoq. Ukioq manna festivaleqartitsineq martsip 27-annit apriilip aallaqqaataanut ingerlanneqarpoq, nipilersortartullu nunani assigiinngitsuneersut 60-it missaanniittunit peqataapput.

- Nunatsinni nipilersornermik festivalini annerpaajuvugut, billitit tunineqartut amerlassusaat aamma tusarnaariat amerlassusaat eqqarsaatiginagit, kisiannili nipilersortartut peqataasut, tusarnaartitsinerit, tusarnaartitsiffisallu ulluisa amerlassusaat pineqarlutik.

Arctic Sounds ukiumoortumik pisarpoq, ukioq kajallallugulu pilersaarusiorneqartarluni. Festivali aningaasarsiutissartaqarani namminerlu kajumissutsiminnik sulisunit ingerlanneqarpoq, aaqqissueqataasullu Laura Lennert Jensenip nuannaarutigaa, inuit nipilersukkat nutaat allaanerusullu tusarnaarnissaannut piumassuseqarnerat, tamannami festivalip siunertarimmagu.

- Inuit ullormut aalajangersimasumut billetsinik pisisinnaanngillat nipilersortartut aalajangersimasut tusarnaarniarlugit, festivalernermulli tamarmut billetsinik pisisarlutik. Nipilersukkat assigiinngitsorpassuit tusarnaassavaat siornatigullu tusaanikuunngisaminnik tusarnaassallutik.

Periarfissatsialak

Arctic Sounds nipilersornerup tungaatigut nunarsuup sinneranut ikaartarfittut taaneqartarpoq, nipilersortartunullu aatsaat aallartittunut periarfissatsialaasoq, Laura Lennert Jensenip oqaatigaa.

- Nipilersortartut Sound of the damned producerissartik savalimmioq Arctic Soundsimi naapinnikuuaat taamaalillutik Savalimmiunut immiussiartornikuupput, taannalu saqqummersitaat Koda Awardsimut innersuunneqarpoq. Mūkikkut ukioq manna Koda Awardsimut isumalluarnartumut nersornaaserneqartut, siullerpaamik Arctic Soundsimi tusarnaartitsinikuupput.

- Andachan aamma Pukuut siullerpaamik Arctic Soundsimi nipilersoqqaarnikuupput. Festivali Kalaallit Nunaannit nipilersortartorpassuarnut ineriartorfiusimavoq.

Nipilersornermik festivalertitsinerup saniatigut Arctic Sounds-imi aamma illoqarfimmi festivalertitsisoqarnerani peqataasartut tunniussassaat tamaasa atorluarnissaat anguniarneqartarpoq.

- Producerimik takkuttoqarpat, qullilerinermut arlaannilluunniit pikkoriffilimmik takkuttoqarsimagaangat atorluartarpagut. Pilersitseqatigiilluni workshopernerit ingerlattarpagut, taakkulu pinnguartarfittut taasarpagut. Pinnguartarpugut, nuannisartarpugut, pilersitseqatigiittarpugut tamattalu naligiippugut. Immitsinnut ilikkagaqarfiginiarluta maaniippugut, nipilersornerlu qitiutittuaannarparput. 

Suli alliartuinnarpoq 

Ukioq manna Arctic Sounds siullermeerluni angalatitsivik Taavani suleqatigalugu Københavnimiit Sisimiunut angalanermik neqerooruteqarpoq, tassani akunnittarfimmi unnuineq, festivalimut, bilitsi Kangerlussuarmilu Sermersuarmut angalaneq akimut ilaallutik. Laura Lennert Jensenillu maluginiarsimavaa nunani allaniit festivali soqutiginiarneqalersimasoq.

- Maluginiarpara nunani allani tusagassiortut soqutiginnittartut, siorna Tysklandinimiit radiomi aallakaatitsisartoq aggernikuuvoq Tysklandimi radiomut aallakaatitassioriartorluni. Ukioq manna Danmarkimiit atuagassiaq nipilersukkanik saqqummersitsisartuni annersaat Gaffamit tikipput, aammattaaq atuagassiaq nunanit tamalaanit nipilersortartunik allaaserisaqartitsisoq, Acces All Areas tikisitsivoq festivalimut peqataajartorluni.

DR TV-mi piviusulersaarusiaq Arctic Assembly pillugu 2022-mi aamma takutinneqarpoq, taannalu suliniutaavoq 2021-mi Arctic Sounds-ip ingerlanneqarneranit pilersinneqartoq.

Festivaali kajumissutsimik suliaqartunik tunngaveqarami festivalimut kajumissutsiminnik suleqataajumasut immersugassaq nittartakkaminni immersussavaat, ukioq mannalu kajumissutsiminnik suleqataajumasut amerlaqaat.

- Ukioq manna kajumissutsiminnik suleqataasut 100-juupput, nuannaarutigeqaarput festivalip iluatsilluarnissaanut Sisimiormiut illoqarfiullu avataanit peqataasut taama amerlatigimmata.

Aaqqissueqataasut maluginiarsimavaat Kalaallit Nunaanni nipilersortartut arlallit namminneq suut tamaasa suliarisaraat, soorlu inniminniisarneq, aaqqissuineq nittarsaassinerlu. Taamaattumik Arctic Sounds-ip nipilersortartut ikiorniarlugit pilersaaruteqarpoq.

- Aaqqissuisut akornatsinni qanittukkut pilersaarusiorpugut nipilersortartut suliassaannik oqilisaallugit ingerlatsivimmik pilersitsissalluta. Taamaalilluta ukiuni qulini kingullerni misilittakkavut attaveqaativullu atorlugit nipilersortartut suli pitsaanerusumik kiffartornissaannut ikiuulluarsinnaanngussagatta.